01.04.2026 | 20:58
Ապօրինի ջրառ՝ գազալցակայաններում և ջերմոցում. ԲԸՏՄ-ն կասեցրել է ապօրինի հորերի շահագործումը
Լավրովը պատմել է, թե ինչ սկզբունքներով է գործել Պուտինը ԼՂ շուրջ ձեռք բերված համաձայնագրի շրջանակում
Քաղաքականություն
24.11.2020 | 17:58
Ցանկացած հակամարտության լուծում պետք է իրականացվի հենց մասնակիցների կողմից՝ միջազգային իրավունքի սկզբունքների հիման վրա, խոշոր տերությունները պետք է դրա համար պայմաններ ստեղծեն և դրսից լուծումներ չթելադրեն։ Այս մասին լրագրողների հետ զրույցում հայտարարել է ՌԴ արտգործնախարար Սերգեյ Լավրովը, փոխանցում է ՏԱՍՍ-ը։
«Մենք բազմիցս տեսել ենք, որ երբ միջազգային խաղացողները սկսում են գործել՝ ելնելով այդ սկզբունքներից, հարգելով միմյանց ինքնիշխանությունը, ինքնիշխան գործերին չխառնվելու սկզբունքը, հարգելով վեճերի խաղաղ կարգավորման սկզբունքը, լուծումները շատ ավելի հեշտ են ձեռք բերվում և դառնում են շատ ավելի կայուն, քան այն իրավիճակներում, երբ խոշոր տերությունները փորձում են չարաշահել իրենց կշիռը և ազդեցությունը որոշակի տարածաշրջանում, ավելի հաճախ այն տարածաշրջանում, որը հեռու է գտնվում իրենց սահմաններից, որպեսզի հակամարտող կողմերին որոշակի պայմաններ թելադրեն: Նման թելադրված հրադադարները, որպես կանոն, երկար չեն գործում»,- հայտարարել է նա:
ՌԴ ԱԳՆ ղեկավարն ընդգծել է, որ հակամարտող կողմերը պետք է միմյանց հետ իրենք պայմանավորվեն, իսկ մյուս բոլոր խաղացողները պետք է պայմաններ ստեղծեն դրա համար՝ չփորձելով արտաքինից ինչ-որ բան թելադրել։
«Հենց այդպես է գործել Ռուսաստանը, մեր նախագահը՝ ստեղծելով պայմաններ, որպեսզի անմիջական հակամարտողները պայմանավորվեն միմյանց հետ, երբ համաձայնեցրել է Լեռնային Ղարաբաղում ռազմական գործողությունների դադարեցման ու հրադադարի մասին նոյեմբերի 9-ին ձեռք բերված համաձայնագիրը ՝ այս տևական հակամարտության լուծման համար պայմաններ ապահովելու համար»,- մատնանշել է Լավրովը:
Տաթև Ֆռանգյան
