05.07.2026 | 01:14
«Ուիմբլդոն». Կարեն Խաչանովը դուրս է մնացել պայքարից
«Աբրահամի համաձայնություններ»․ Իսրայելի եռակողմ գործարքը ԱՄԷ-ի և Բահրեյնի հետ
Քաղաքականություն
24.11.2020 | 14:16
Իսրայելի վարչապետ Բենիամին Նեթանյահուն հայտարարել է, որ հեռախոսազրույց է ունեցել Բահրեյնի թագաժառանգ Սալման բեն Համադ բեն Իսոյ Ալ Խալիֆի հետ և ընդունել մոտ ապագայում պաշտոնական այցով արաբական այդ երկիր այցելելու հրավերը, գրում է Reuters-ը։
Միացյալ Նահանգների միջնորդությամբ՝ Բահրեյնը հետևել է Արաբական Միացյալ Էմիրությունների օրինակին Իսրայելի հետ հարաբերությունները կարգավորելու հարցում, ինչը նշանակում է Իրանի դեմ Մերձավոր Արևելքում նոր ռազմավարական դաշինք, նշում է գործակալությունը։
«Երկուսս էլ ուրախ ենք, որ այսքան կարճ ժամանակահատվածում խաղաղության պտուղներ ենք բերելու մեր ժողովրդներին և երկրներին: Այդ պատճառով Ալ Խալիֆն ինձ հրավիրել է մոտ ապագայում պաշտոնական այցով գնալ Բահրեյն, և ես դա կանեմ մեծ ուրախությամբ»,- հայտարարել է Նեթանյահուն՝ մեկնաբանելով թագաժառանգի հետ հեռախոսազրույցը։
Հավելենք, որ Իսրայելի եռակողմ գործարքը ԱՄԷ-ի և Բահրեյնի հետ ստացել է «Աբրահամի համաձայնություններ» անվանումը՝ աստվածաշնչյան կերպար, որը համարվում է հուդայականության, քրիստոնեության և իսլամի բոլոր հետևորդների հոգևոր հայրը: Պաղեստինը կտրականապես դեմ է արտահայտվել այս համաձայնություններին և հետ կանչել իր դեսպաններին Աբու Դաբիից և Մանամայից: Հոկտեմբերի 23-ին ԱՄՆ նախագահ Դոնալդ Թրամփը հայտարարել էր, որ Սուդանը և Իսրայելը պայմանավորվել են կարգավորել հարաբերությունները՝ ըստ «Աբրահամյան համաձայնությունների»:
Տաթև Ֆռանգյան
