17.09.2026 | 20:00
Սպառնալիք կա Ալիևի մտածողության մեջ․ ագրեսիայի շանս կստանա, եթե ՀՀ-ն ուշ է խոսում վտանգներից․ Մեսրոպ Առաքելյան․ ՏԵՍԱՆՅՈՒԹ
ՌԴ֊ն Հայաստանին COVID-ի պատվաստանյութի օրինակներ է տվել. ԱՆ
Քաղաքականություն
21.11.2020 | 17:12
ԱՆ հիվանդությունների վերահսկման և կանխարգելման ազգային կենտրոնի «Ռեֆերենս լաբորատոր ծառայությունների կենտրոն» մասնաճյուղում տեղի է ունեցել Սպառողների իրավունքների պաշտպանության և մարդու բարեկեցության ոլորտում վերահսկողության ՌԴ դաշնային ծառայության (Ռոսպոտրեբնադզոր) կողմից Հայաստանի Հանրապետության առողջապահության նախարարությանը նվիրաբերված շարժական լաբորատորիայի բացման հանդիսավոր արարողությունը, որին մասնակցել են Հայաստանի առողջապահության նախարար Արսեն Թորոսյանը, Ռուսաստանի առողջապահության նախարար Միխայիլ Մուրաշկոն, Սպառողների իրավունքների պաշտպանության և մարդու բարեկեցության ոլորտում վերահսկողության ՌԴ դաշնային ծառայության (Ռոսպոտրեբնադզոր) ղեկավար Աննա Պոպովան և երկու երկրների առողջապահության ոլորտի այլ ներկայացուցիչներ։
Ողջունելով հյուրերին` Արսեն Թորոսյանը մասնավորապես ասել է. «Անգնահատելի է տարիներ շարունակ ռուս գործընկերների կողմից մեր երկրի առողջապահական համակարգի զարգացմանն ուղղված աջակցությունը: Օգնություն, որը հատկապես կարևոր էր այն օրերին, երբ Հայաստանը գտնվում էր ծանր իրավիճակում, պայքարում էինք միաժամանակ երկու ուղղությամբ՝ պայմանավորված COVID-19 համավարակով և Լեռնային Ղարաբաղում ռազմական գործողություններով», – նշել է նախարարը` հավելելով, որ ռուսական կողմը Հայաստանին տրամադրել և շարունակում է տրամադրել օգնություն ՄԻԱՎ/ՁԻԱՀ –ի, վարակիչ և ոչ վարակիչ հիվանդությունների դեմ պայքարում:
Նախարարը նաև ընդգծել է, որ Հայաստանին աջակցության ծրագրերի շրջանակներում հատկացվել են պատվաստանյութեր, լաբորատոր և ախտորոշիչ սարքեր, այդ թվում` ախտորոշիչ-բուժական շարժական կլինիկաներ: Միաժամանակ, COVID-19 համավարակի առաջին իսկ օրերից Ռուսաստանի Դաշնությունն անգնահատելի օգնություն է ցուցաբերել Հայաստանի առողջապահական համակարգին: Կորոնավիրուսային հիվանդության դեմ պայքարի նպատակով Սպառողների իրավունքների պաշտպանության և մարդու բարեկեցության ոլորտում վերահսկողության ՌԴ դաշնային ծառայությունը (Ռոսպոտրեբնադզոր), մարդասիրական օգնության շրջանակներում, պարբերաբար Հայաստանին է տրամադրում թեստ-համակարգեր և COVID-19 լաբորտարոր ախտորոշման համար ռեագենտներ:
«Այսօր մենք երախտագիտությամբ ընդունում ենք ռուս գործընկերների հերթական կարևոր օգնությունը: Մեզ է նվիրաբերվել մեկ այլ շարժական ախտորոշիչ և բուժման համակարգ, որը կօգնի պայքարել վարակիչ հիվանդությունների դեմ և կանխել դրանց տարածումը»,- նշել է Արսեն Թորոսյանը:
«Մեր հարաբերությունները մեծ պատմություն ունեն: Մենք վաղուց ենք համագործակցում և ունենք ընդհանուր համաճարակաբանական դպրոց, որը մեզ թույլ է տալիս պայքարել մեծ քանակությամբ ինֆեկցիոն հիվանդությունների դեմ: Վերջին 5 տարվա ընթացքում մենք իրականացնում ենք ռուս-հայկական համատեղ տարբեր 6 ծրագիր՝ կարմրուկի և կարմրախտի չեզոքացման, ՄԻԱՎ/ՁԻԱՀ-ի դեմ պայքարի, միջազգային բժշկասանիտարական կանոնների զարգացման ուղղությամբ: Խոշոր ծրագրեր ունենք նաև կապված ժանտախտի օջախների հայտնաբերման, հակաբիոտիկների պատշաճ կիրառման հետ: Մենք աշխատում ենք միասին և փորձում ենք անել ամենը, որպեսզի մեր 2 երկրի համաճարակաբանական ընդհանուր տարածքում ամեն ինչ հանգիստ լինի: Այդ է պատճառը, որ, երբ ի հայտ եկավ նոր սպառնալիք, մենք պատրաստ էինք օգնության հասնելու»,- մանրամասնել է Աննա Պոպովան, հավելելով, որ ներկայումս համատեղ ջանքերով մշակվում է նաև «առանց քովիդի» ճամփորդությունների պիլոտային ծրագիրը, ինչը հնարավորություն կտա սահմանները հատել՝ ներկայացնելով միայն լաբորատոր թեստի արդյունքների շտրիխ-կոդը՝ խնայելով ժամանակ և ռեսուրսներ:
ՌԴ առողջապահության նախարար Միխայիլ Մուրաշկոն իր խոսքում նշել է, որ ռազմական վնասվածքներով մեծ քանակությամբ պացիենտները լուրջ մարտահրավեր են առողջապահության համար: Բժիշկների կողմից այդ իրավիճակը վերահսկողության տակ պահելն իսկապես հերոսություն է:
«Մենք պատրաստ ենք տրամադրել մեր հայ գործընկերներին թե գործնական, թե խորհրդատվական օգնություն այս ոլորտում»,- ասել է նախարարը:
Ավարտելով խոսքը` Միխայիլ Մուրաշկոն հայտնել է, որ Հայաստանին նվեր են բերել COVID-19-ի «Սպուտնիկ V» պավաստանյութի օրինակներ, որոնք ՌԴ առողջապահության նախարարը փոխանցել է իր հայ գործընկերոջը:
Այնուհետև, գործընկերներն անցկացրել են փակ խորհրդակցություն, որտեղ քննարկել են համատեղ իրականացվող ծրագրերի ընթացքը, համագործակցության շրջանակները և հետագա անելիքները: Հանդիպման ավարտին «Ռոսպոտրեբնադզորի» ղեկավարը ոլորտի պատասխանատուներին դեկտեմբերին հրավիրել է Ռուսաստանի Դաշնություն` միջազգային գիտա-գործնական համաժողովին մասնակցելու համար:
Հիշեցնենք, որ լաբորատորիայի տրամադրման համար հիմք է ծառայել 2 տարի առաջ Սարատովում կայացած հանդիպման ժամանակ Արսեն Թորոսյանի և Սպառողների իրավունքների պաշտպանության և մարդու բարեկեցության ոլորտում վերահսկողության ՌԴ դաշնային ծառայության (Ռոսպոտրեբնադզոր) ղեկավար Աննա Պոպովայի միջև ձեռք բերված պայմանավորվածությունը: Շարժական լաբորատորիան նախատեսված է հատուկ վտանգավոր վարակների հարուցիչների հայտնաբերման նպատակով դասական կենսաբանական, ինչպես նաև ՊՇՌ մեթոդներով հետազոտություններ իրականացնելու համար:
