Ստեփանակերտում աշխատանքն է սկսել միջգերատեսչական մարդասիրական կենտրոնը. Միխայիլ Միզինցև

Ստեփանակերտի մարդասիրական արձագանքման միջգերատեսչական կենտրոնն այսօրվանից անցնում է լիարժեք աշխատանքի։ Այս մասին հայտնել է ՌԴ Պաշտպանության կառավարման ազգային կենտրոնի ղեկավար, գեներալ-գնդապետ Միխայիլ Միզինցևը՝ նշելով, որ Լեռնային Ղարաբաղում արյունահեղության դադարեցումից հետո հումանիտար խնդիրներն առաջին պլանում են, փոխանցում է ՌԻԱ Նովոստի-ն:

«Շնորհիվ ՌԴ ռազմաքաղաքական ղեկավարության օպերատիվ որոշումների՝ հաջողվել է դադարեցնել Լեռնային Ղարաբաղի գոտում արյունահեղությունը։ Ռուս խաղաղապահներն այժմ հաջողությամբ ապահովում են միջոցառումների ամբողջ համալիրը, որը կապված է տարածաշրջանում խաղաղ կյանքի հաստատման հետ։ Այսօր առաջին պլան են մղվում մարդասիրական խնդիրները»,- ասել է Միզինցևը միջգերատեսչական համագործակցության հարցերին նվիրված համաժողովի ժամանակ։

«Այս նպատակով Ստեփանակերտում այսօրվանից կսկսի գործել մարդասիրական արձագանքման միջգերատեսչական կենտրոնը»,- հավելել է նա:

Նշվում է, որ կենտրոնի հիմնական խնդիրն իրենց բնակության վայրերը լքած քաղաքացիների վերադարձն է, բնակչության  նորմալ կենսագործունեության համար ենթակառուցվածքների վերականգնման համար Հայաստանին ու Ադրբեջանին օգնություն ցուցաբերելը, Ռուսաստանի պետական ​​մարմինների և կազմակերպությունների գործունեության համակարգումը` ռազմական գործողությունների արդյունքում տուժած շրջանների բնակիչներին մարդասիրական օգնություն տրամադրելու նպատակով:

Տաթև Ֆռանգյան