ԱՀԿ-ն հայտնել է մեկ շաբաթում կորոնավիրուսով վարակվածների թվի ռեկորդային աճի մասին

Անցած շաբաթվա ընթացքում աշխարհում կորոնավիրուսով վարակվածների թիվն աճել է գրեթե 4 միլիոնով, ինչը համաճարակի սկզբից ի վեր ամենաբարձր ցուցանիշն է: Հիվանդությունից մահվան դեպքերի թիվն աճել է ավելի քան 59 հազարով: Այս մասին հայտնել է Առողջապահության համաշխարհային կազմակերպությունը (ԱՀԿ), գրում է ՏԱՍՍ-ը։

ԱՀԿ-ի տվյալների համաձայն ՝ նոյեմբերի 8-ից 15-ն ընկած ժամանակահատվածում աշխարհում գրանցվել է վարակի 3,977,223 և մահվան 59,699 դեպք։ Այս երկու ցուցանիշներն էլ զգալիորեն աճել են նախորդ յոթ օրվա համեմատ, երբ հայտնաբերվել էր վարակի 3,695,495 նոր դեպք,  մահացել՝ 54,835 մարդ:

«Չնայած Եվրոպայի տարածաշրջանը շարունակում է հայտնել վարակակիրների ամենամեծ թվով դեպքերի մասին (46%),  անցած շաբաթվա ընթացքում այդ թիվը նվազել է 10%-ով՝ հանրային առողջապահության ոլորտում ձեռնարկված միջոցառումների խստացման արդյունքում»,- նշել են ԱՀԿ-ում:

Հին աշխարհում, նոյեմբերի 8-ից 15-ը ընկած ժամանակահատվածում, գրանցվել է վարակի 1,840,085 և մահվան 29,043 դեպք:

Հյուսիսային ու Հարավային Ամերիկայում մեկ շաբաթում վարակվածների թիվն ավելացել է ավելի քան 1,45 միլիոնով, մահացել է ավելի քան 19 հազար մարդ: Հարավարևելյան Ասիայում վարակվել է ավելի քան 373 հազար մարդ, իսկ յոթ օրվա ընթացքում մահվան դեպքերը գերազանցել են 4,5 հազարը:

Միացյալ Նահանգներում վարակվածների թիվն աճել է ավելի քան 1 միլիոնով, Հնդկաստանում՝ ավելի քան 306 հազարով, Իտալիայում՝ ավելի քան 242 հազարով, Ֆրանսիայում՝ ավելի քան 203 հազարով, Բրազիլիայում՝ ավելի քան 179 հազարով: Այս երկրներին հաջորդում են Միացյալ Թագավորությունը, որտեղ յոթ օրվա ընթացքում գրանցվել է գրեթե 173 հազար վարակման նոր դեպք, Լեհաստանը (ավելի քան 169 հազար), Ռուսաստանը (ավելի քան 151 հազար), Գերմանիան (գրեթե 132 հազար) և Իսպանիան (ավելի քան 87 հազար):

Տաթև Ֆռանգյան