Սերգեյ Լավրովը՝ ԼՂ-ում խաղաղ կյանքի հաստատմանն ուղղված քայլերի մասին

ՌԴ ԱԳՆ ղեկավար Սերգեյ Լավրովն այսօր ռուսական և արտասահմանյան լրատվամիջոցների մասնակցությամբ առցանց ասուլիսի ժամանակ անդրադառնաով Լեռնային Ղարաբաղի հակամարտության կարգավորման հարցում ԱՄՆ դերակատարությանը՝ նշել է, որ ԱՄՆ պետքարտուղար Մայք Պոմպեոն հանդիպում է ունեցել ԼՂ հակամարտության կողմերի հետ և չի կարող ասել, որ դրանք ապարդյուն են եղել՝ չնայած ձեռք բերված պայմանավորվածությունները կյանքի չեն կոչվել, սակայն այդ բոլոր հանդիպումները հիմք են հանդիսացել ձեռք բերված համաձայնագրի համար։

Լավրովը նշել է, որ ինքն անձամբ զրուցել է ֆրանսիացի գործընկերոջ, իսկ իր աշխատակիցները՝ ամերիկացի գործընկերների հետ, և զգացել է, որ համանախագահ մյուս երկրների մոտ ինչ-որ վրդովմունք կա, թե ինչու իրենք նախօրոք չեն տեղեկացվել կնքվելիք պայմանագրի մասին։ ՌԴ ԱԳՆ ղեկավարն այս առնչությամբ նշել է, որ Մոսկվան բազմիցս հայտարարել է, որ աշխատում է կրակի դադարեցման ուղղությամբ։

Լավրովը շեշտել է, որ համաձայնությունները ձեռք են բերվել ԵԱՀԿ Մինսկի խմբի շրջանակում ձեռք բերված պայմանավորվածությունների հիման վրա։ Նա նաև ընդգծել է, որ Ֆրանսիայի և ԱՄՆ ներկայացուցիչները հրավիրվել են Մոսկվա՝ քննարկելու, թե ինչ դերակատարություն կարող են ունենալ համանախագահ մյուս երկրները ձեռք բերված համաձայնագրի կյանքի կոչման հարցում։

Ըստ Լավրովի՝ սա նախ և առաջ վերաբերում է Ղարաբաղում խաղաղ կյանքի հաստատմանը, էթնո-դավանանաբանական խմբերի համակեցությանը, մշակութային, կրոնական վայրերի վերածննդին, դրանց հանդեպ անվտանգ և հարգալից գործունեության ապահովմանը։ Ըստ Լավրովի՝ այս հարցում մեծ դերակատարում կարող են ունենալ համանախագահները, ՄԱԿ-ի կազմակերպություններն, ինչպիսին է առաջին հերթին ՅՈՒՆԵՍԿՕ-ն։

«Մենք արդեն նախնական խոսակցություններ ենք սկսել ՄԱԿ-ի փախստականների հարցերով մեր գործընկերների ու Կարմիր խաչի հետ։ Ի դեպ, Կարմիր խաչը թե՛ Հայաստանում և թե՛ Ադրբեջնում գործունեություն ծավալելու համար երկար տարիներ է  մադատ ունի»,- հայտարարել է Լավրովը՝ նշելով, որ հանդիպումներ են նախատեսվում Կարմիր խաչի ղեկավարի հետ՝ քննարկելու զոհվածների դիերի, գերիների ու վիրավորների փոխանակմանն առնչվող հարցերը։

Տաթև Ֆռանգյան