«Լրագրողներ առանց սահմանների» կազմակերպությունը դատապարտել է Հարավային Կովկասում լրագրողների դեմ բռնությունը

«Լրագրողներ առանց սահմանների» միջազգային իրավապաշտպան կազմակերպությունը դատապարտել է Լեռնային Ղարաբաղի հակամարտության ընթացքում լրատվամիջոցների ներկայացուցիչների նկատմամբ կիրառվող բռնությունն ու սպառնալիքները: Այս մասին ասվում է նոյեմբերի 11-ին կազմակերպության տարածած հայտարարության մեջ, գրում է DW-ի ռուսական ծառայությունը։

Նշվում է, որ Հայաստանի և Ադրբեջանի միջև ռազմական գործողությունների արդյունքում սեպտեմբերի վերջից առնվազն յոթ լրագրող է վիրավորվել, իսկ նոյեմբերի 10-ին մոտ 40 մարդ հարձակվել է Երևանում «Ազատություն» ռադիոկայանի խմբագրության վրա՝ ի նշան բողոքի հրադադարի ռեժիմի դեմ: Հարձակվողներն աշխատակիցներին անվանել են «դավաճաններ» և սպառնացել կոտրել համակարգիչներն ու տեսախցիկները, իսկ «Ազատություն» ռադիոկայանի հայկական ծառայության գլխավոր պրոդյուսեր Արտակ Համբարձումյանն ավելի ուշ հայտարարել է, թե հարձակվողների մեջ ճանաչել է առաջատար ընդդիմադիր քաղաքական գործիչներից մեկին:

«Լեռնային Ղարաբաղում պարբերաբար հարձակումներ են եղել լրագրողների վրա, ինչը բացահայտորեն խախտում է միջազգային իրավունքը»,- նշել է կազմակերպության գործադիր քարտուղար Քրիստիան Միրը:

Նա, մասնավորապես, մատնանշել է հոկտեմբերի 9-ին Շուշիի գնդակոծությունը, որի արդյունքում վիրավորվել են երեք ռուս լրագրողներ, այդ թվում՝ ծանր վիրավորվել է ռազմական լրագրող Յուրի Կոտենոկը:

Տաթև Ֆռանգյան