14.09.2026 | 23:23
Պապիկյանի գլխավորած պատվիրակությունն աշխատանքային այցով մեկնել է Չինաստան
Երևանը պատրաստ է դեսպաններին ցույց տալ Լեռնային Ղարաբաղում գերեվարված ահաբեկիչներին․ Ալեն Սիմոնյան
Քաղաքականություն
06.11.2020 | 17:25
Երևանը պատրաստ է ցանկացած երկրի դեսպանի ցույց տալ Լեռնային Ղարաբաղում գերեվարված ահաբեկիչներին։ Այս մասին ՏԱՍՍ-ին հայտնել է Հայաստանի Ազգային ժողովի փոխնախագահ Ալեն Սիմոնյանը։
Նրա խոսքով՝ այսօր արդեն փաստ է, որ Ղարաբաղում գործում են ահաբեկիչները։
«Մենք Սիրիայից ու Լիբիայից գերեվարված վարձկաններ ունենք, որոնք ամեն ինչ պատմում են։ Հայաստանը պատրաստ է ցանկացած դեսպանի հնարավորություն ընձեռել շփվել ահաբեկիչների հետ, որոնք գերեվարվել են մարտական գործողությունների ժամանակ։ Ես՝ որպես իշխանության ներկայացուցիչ, պարտավորություն եմ վերցնում կազմակերպել նման հանդիպում»,- հայտարարել է Սիմոնյանը։
Վերջինս հայտարարել է, որ ներկայիս պայմաններում հնարավոր չի համարում ՀՀ վարչապետ Նիկոլ Փաշինյանի հանդիպումը Ադրբեջանի նախագահ Իլհամ Ալիևի հետ։
«Վարչապետն արդեն հայտարարել է, որ պատրաստ է հանդիպել։ Նման հայտարարություն է արել նաև Ադբեջանի նախագահը։ Սակայն ես դրան չեմ հավատում։ Այս փուլում այս խնդրին դիվանագիտական լուծում տալը չափազանց դժվար կլինի»,- ասել է նա։
Տաթև Ֆռանգյան
