Բայդենն առաջ է անցել Թրամփից հաղթանակի համար առանցքային Ջորջիա նահանգում

ԱՄՆ Դեմոկրատական կուսակցությունից նախագահի թեկնածու Ջո Բայդենը առաջ է անցել ընտրություններում հաղթելու համար կարևոր նշանակություն ունեցող Ջորջիա նահանգում, որտեղ երկար ժամանակ առաջատար էր Դոնալդ Թրամփը։ Այս մասին հայտնում է Fox News հեռուստաալիքը։

Քվեաթերթիկների 99 տոկոսի հաշվարկի արդյունքներով՝ Բայդենը հավաքել է ձայների 49,39 տոկոսը, Թրամփը՝ 49,37-ը։  Տարբերությունը կազմում է ընդամենը 917 ձայն։

Հավելենք, որ Ջորջիան 16 քվեով այն 4 կարևոր նահանգներից է, որոնք կարող են վճռել ընտրությունների արդյունքները, սակայն դեռևս այստեղ հայտնի չեն քվեարկության վերջնական արդյունքները։ Սակայն Թրամփի գրասենյակն արդեն հայց է ներկայացրել նահանգի դատարան՝ պահանջելով ընտրական հանձնաժողովից հետևել քվեների հաշվարկման բոլոր օրենքներին ու փոստով ստացված քվեաթերթիկների պահպանման կանոններին։

Նկատենք, որ ԱՄՆ ընտրություններում հաղթելու համար թեկնածուն պետք է հավաքի առնվազն 270 քվե։ Վերջին տվյաների համաձայն Բայդենն ունի 264 քվե, իսկ Թրամփը՝ 214։ Ջորջիայից բացի ձայների հաշվարկ է ընթանում նաև Փենսիլվանիայում, Հյուսիսային Կարոլինայում ու Նևադայում։

Հաշվարկի ձգձգումը պայմանավորված է նրանով, որ կորոնավիրուսային համաճարակի պատճառով շատ ընտրողներ քվեարկել են փոստով, և նրանց քվեաթերթիկները դեռ շարունակում են ստանալ ընտրական հանձնաժողովները։ Մասնավորապես, Նևադայում հայտարարել են, որ  նման քվեաթերթիկները կընդունեն մինչ նոյեմբերի 10-ը։

Տաթև Ֆռանգյան