ՌԴ Պետդումա երկրի նախկին ղեկավարի անձեռնմխելիության վերաբերյալ օրինագիծ է ներկայացվել

ՌԴ Պետդումա նախկին նախագահի անձեռնմխելիության մասին օրինագիծ է ներկայացվել՝ անկախ նախագահի ղեկավարման ժամանակահատվածից։ Այս մասին ՌԻԱ Նովոստիին հայտնել է Դաշնային  խորհրդի սահմանադրական օրենսդրության կոմիտեի նախագահ Անդրեյ Կլիշասը:

Այժմ երկրի նախկին ղեկավարին հնարավոր չէ ենթարկել քրեական հետապնդման կամ վարչական պատասխանատվության արարքների համար, որոնք վերջինը կատարել է իր ղեկավարման ժամանակաշրջանում։ Նախկին նախագահին չի կարելի նաև ձերբակալել, կալանավորել, խուզարկել, հարցաքննել կամ ստուգել, եթե գործը կապված է երկրի ղեկավարի պարտականությունների կատարման հետ։

«Օրինագիծը բացառում է հակաիրավական գործողությունների կատարման ժամկետների մատնանշումը: Այսպիսով, ընդլայնվում է իր լիազորությունների կատարումը դադարեցրած նախագահի անձեռնմխելիության ժամանակային ազդեցության շրջանը»,- պարզաբանել է Կլիշասը։

Այս նախագծով փոփոխվում է անձեռնմխելիությունից զրկելու գործընթացը։ Եթե օրինագիծն ընդունվի, երկրի նախկին նախագահը կարող է զրկվել անձեռնմխելիությունից, եթե նրա դեմ քրեական գործ հարուցվի երկրի ղեկավարի պարտականությունները կատարելու ժամանակահատվածում ծանր հանցագործություններ կատարելու վերաբերյալ։

Գործընթացը պետք է նախաձեռնի Քննչական կոմիտեի նախագահը: Դա անելու համար նա պարտավոր է համապատասխան փաստաթուղթն ուղարկել Պետդումա:

Համաձայն նոր նախագծի՝ նախկին նախագահին անձեռնմխելիությունից կարող է զրկել Դաշնային խորհուրդը և միայն Պետդումայի կողմից «դավաճանության կամ այլ ծանր հանցագործություն կատարելու» մեղադրանքի հիման վրա: Դրանից հետո մեղադրանքը պետք է հաստատվի Գերագույն և Սահմանադրական դատարանների կողմից:

Տաթև Ֆռանգյան