Ավստրալիայի ցեղասպանության ուսումնասիրության ինստիտուտն Ադրբեջանի գործողություններում ցեղասպանության վտանգ է տեսնում

Ավստրալիայի Հոլոքոստի և ցեղասպանության ուսումնասիրությունների ինստիտուտը (AIHGS) լուրջ մտահոգություններ ունի Արցախում հակամարտության, մասնավորապես՝ բնիկ հայ բնակչության նկատմամբ ցեղասպանության ռիսկի աճի վերաբերյալ: Այս մասին ասվում է ինստիտուտի ֆեյսբուքյան էջում հրապարակված հոդվածում։

AIHGS-ն Ավստրալիայի կառավարությանը կոչ է անում անհապաղ միջոցներ ձեռնարկել` կանխելու հետագա վայրագությունները և պատերազմական հանցագործությունները մի ժողովրդի նկատմամբ, որն արդեն ցեղասպանություն է կրել և երբեք չի տեսել արդարություն:

Հրապարակված հոդվածում նշվում է, որ 2020 թվականի սեպտեմբերի 27-ից սկսած Ադրբեջանը, որին աջակցում է Թուրքիան, ագրեսիվ գրոհներ է սկսել Արցախի դեմ, այդ թվում ՝ հարձակումներ է իրականացվել հայ խաղաղ բնակիչների դեմ: Ադրբեջանի գործողություններն ուղեկցվում են ռազմական ու  մարդկության դեմ ուղղված հանցագործություններով ։Նշվում է , որ Ադրբեջանն օգտագործում է հեռահար հրթիռներ, անօդաչու սարքերի ու կասետային ռումբեր, որոնք արգելված են միջազգային օրենքներով:

Ինստիտուտն ընդգծում  է, որ այդ հարձակումների հետևանքով զոհվել են խաղաղ բնակիչներ, ավերվել են տներ մայրաքաղաք Ստեփանակերտում, ինչպես նաև հիվանդանոցներ, դպրոցներ և մշակութային-կրոնական կենտրոններ, ինչպիսիք են Շուշիի Սուրբ Ամենափրկիչ տաճարը։ Այս ամենն արգելված է միջազգային մարդասիրական իրավունքով:

Ավելի քան 70,000 մարդ տեղահանվել է Արցախի Հանրապետությունից, հազարավոր մարդիկ ապաստանում են ստորգետնյա նկուղներում:

Թուրքիան, որը շարունակում է հերքել իր օսմանյան նախնիների կողմից մեկ դար առաջ իրականացված Հայոց ցեղասպանությունը, շարունակում է նյութական աջակցություն ցուցաբերել Ադրբեջանին ՝  զենքի և սիրիայից օտարերկրյա վարձկաններ տեղափոխելու տեսքով: Իրապես, նախագահ Էրդողանը հանձն է առել «իր պապերի առաքելությունը՝ ցեղասպանություն կատարելու» Թուրքիայի մտադրությանը, և վերջերս հայերին անվանել է «թրի մնացորդներ» («kilic artigi» – թուրքերի համար նվաստացուցիչ տերմին, որով դիմում են զանգվածային սպանություններից փրկվածներին ):

Ինստիտուտի հրապարակած հոդվածում նշվում է, որ համանման ատելության խոսք է տարածում նաև նախագահ Ալիևը: Օրինակ՝ հոկտեմբերին նախագահ Ալիևը հայտարարել էր. «Մենք նրանց ցույց տվեցինք, թե ով ենք մենք: Մենք նրանց հետապնդում ենք շների պես»:

Ավստրալիայի Հոլոքոստի և ցեղասպանության ուսումնասիրությունների ինստիտուտն Ավստրալիայի կառավարությանը կոչ է անում օգտագործել բոլոր դիվանագիտական միջոցները`ստիպելու Ադրբեջանին՝ կատարել միջազգային մարդասիրական իրավունքով ստանձնած պարտավորությունները, դատապարտել ատելության խոսքը, ցեղասպանության մտադրությունը և ցեղասպանության ժխտումը Ադրբեջանի և Թուրքիայի կողմից, դատապարտել օտարերկրյա վարձկանների օգտագործումը, միջոցներ ձեռնարկել Ադրբեջանին և Թուրքիային վայրագությունների և ռազմական հանցագործությունների համար պատասխանատվության ենթարկելու համար, մարդասիրական օգնություն տրամադրել Արցախի ժողովրդին:

Տաթև Ֆռանգյան