29.04.2026 | 22:45
ՀՀ տարածքում ավտոճանապարհները հիմնականում անցանելի են
6 մագնիտուդով երկրաշարժը ցնցել է Թուրքիան, Հունաստանն ու Եգիպտոսը․ ցունամիի վտանգի մասին է հայտարարվել
Քաղաքականություն
14.05.2025 | 15:16
Միջերկրական ծովի արևելյան հատվածում չորեքշաբթի առավոտյան 6.0 մագնիտուդով ուժեղ երկրաշարժ է գրանցվել։ Ըստ ԱՄՆ երկրաբանական ծառայության (USGS)՝ էպիկենտրոնը գտնվել է հունական Կասոս կղզու մոտակայքում՝ մոտավորապես 78 կիլոմետր (48.67 մղոն) խորության վրա։ Ցնցումները զգացվել են մի շարք երկրներում, այդ թվում՝ Հունաստանում, Թուրքիայում, Եգիպտոսում, Լիբանանում և Հորդանանում, գրում է Turkiye today-ը։
Հունական լրատվամիջոցները հաղորդել են, որ երկրաշարժից կարճ ժամանակ անց Հռոդոս, Կարպատոս և Կասոս կղզիների բնակիչներին արտակարգ տագնապ է ուղարկվել «հնարավոր ցունամիի վտանգի» մասին։
Թուրքիայում երկրաշարժը զգացվել է մի քանի նահանգներում, այդ թվում՝ Դենիզլիում, Անթալիայում, Այդընում, Իսպարտայում, Բուրդուրում, Մանիսայում և Իզմիրում: Աղետների և արտակարգ իրավիճակների կառավարման վարչությունը (AFAD) հայտնել է, որ երկրաշարժի էպիկենտրոնը գտնվել է Միջերկրական ծովում՝ Մուղլայի զբոսաշրջային Դատչա շրջանից մոտավորապես 155 կիլոմետր հարավ, 20.41 կիլոմետր խորության վրա։
Մուղլայի նահանգապետ Իդրիս Աքբիյիկը հայտարարել է, որ նահանգում բացասական հետևանքներ չեն գրանցվել, և արտակարգ ծառայությունների և տեղական իշխանությունների հետ կապի ուղիները շարունակում են ակտիվ մնալ։
Եգիպտոսի Աստղագիտության և երկրաֆիզիկայի ազգային հետազոտական ինստիտուտը հաստատել է, որ երկրաշարժը զգացվել է մի քանի շրջաններում, այդ թվում՝ մայրաքաղաք Կահիրեում։
Հունաստանի իշխանություններն էլ հայտնել են, որ երկրաշարժը ուժեղ զգացվել է Կրետե, Ռոդոս, Կոս և Կարպատոս կղզիներում։ Հունաստանի երկրաշարժերի պլանավորման և պաշտպանության կազմակերպության ղեկավար Էֆթիմիոս Լեկկասը նշել է, որ երկրաշարժի խորությունը նվազեցրել է դրա ազդեցությունը, որի արդյունքում էական վնասներ չեն եղել։
Այնուամենայնիվ, որպես նախազգուշական միջոց, հարավային Հունաստանում հայտարարվել է ցունամիի մասին նախազգուշացում։
Թարգմանությունը՝ Էմմա Չոբանյանի
