Բաքվից պնդում են՝ Հնդկաստանի կողմից ՀՀ-ին զենքի մատակարարումները խնդիր են ստեղծում Ադրբեջանի անվտանգության համար

Հնդկաստանի կողմից Հայաստանին զենքի մատակարարումները, ինչպես նաև Երևանին ցուցաբերվող աջակցությունը խնդիր են ստեղծում Ադրբեջանի ազգային անվտանգության համար։ Ադրբեջանական լրատվամիջոցների հաղորդմամբ՝ այս մասին հայտարարել է Միլլի Մեջլիսի միջազգային հարաբերությունների և միջխորհրդարանական հարաբերությունների հանձնաժողովի անդամ Ֆարիզ Իսմայիլզադեն՝ «Գլոբալ Հարավի և Արևմուտքի վերելքը. Ադրբեջանի դերը, համագործակցության և զարգացման նոր հնարավորություններ» թեմայով քննարկումների ժամանակ:

«Հնդկաստանի կողմից Հայաստանին ցուցաբերվող աջակցությունը, զինումը, հրթիռների և այլ սարքավորումների մատակարարումը խնդիր է մեր ազգային անվտանգության համար»,- ասել է նա։

Նույն քննարմանը Ադրբեջանի ԱԳ փոխնախարար Յալչին Ռաֆիևը հայտարարել է, թե Հնդկաստանը պետք է զգույշ լինի ադրբեջանա-հայկական հարաբերություններում։

«Հնդկա-պակիստանյան հարցի վերաբերյալ Ադրբեջանի դիրքորոշումը նույնպես հիմնված է միջազգային իրավունքի վրա: Հնդկաստանը և այլ երրորդ կողմերը պետք է ուշադիր լինեն նաև ադրբեջանա-հայկական հարաբերություններում, որոնք ապրում են փխրուն շրջան: Այստեղ մենք բոլոր պետություններից, այդ թվում՝ Հնդկաստանից, ակնկալում ենք, որ որևէ կոնկրետ քայլ չի ձեռնարկվի, որը կարող է վնասել այս գործընթացին»,- ասել է նա։

Հիշեցնենք, որ վերջերս Բաքվում Պակիստանի դեսպանը հայտարարել էր, որ Հնդկաստանը արգել է սահմանել Ադրբեջանից ապրանքների ներմուծման վրա, սակայն այս տեղեկությունը  պաշտոնական Բաքուն ու Նյու Դելին դեռ չեն արձագանքել այս հայտարարությանը։

Թարգմանությունը՝ Էմմա Չոբանյանի