Ֆրանսիան հատուկ բանագնաց կնշանակի մուսուլմանական երկրներում հակաֆրանսիական տրամադրությունները ցրելու համար․ The Guardian

Ֆրանսիան մտադիր է հատուկ բանագնաց  նշանակել, որը կբացատրի Էմանուել Մակրոնի մտածողությունը աշխարհիկության և խոսքի ազատության վերաբերյալ՝ որոշ մահմեդական երկրներում աճող հակաֆրանսիական արձագանքը զսպելու համար,  գրում է The Guardian-ը:

Հակաֆրանսիական տրամադրությունների աճը կարող է խորացնել նաև Մակրոնի և Թուրքիայի միջև առանց այդ էլ արմատացած հակամարտությունը Լիբիայի  և Միջերկրական ծովի արևելքում նավթի արդյունահանման շուրջ:

Պարբերականը նշում է, որ Մակրոնն արդեն  երկար հարցազրույց է տվել Al Jazeera Arabic- ին `փորձելով արդարացնել իր մոտեցումը, սակայն դեռևս  լիարժեք աջակցություն է ստացել միայն Արաբական Միացյալ Էմիրությունների արտաքին գործերի նախարար Անվար Գարգաշից:

Հայտնի է նաև, որ Մակրոնը հեռախոսազրույց է ունեցել նաև Պաղեստինի առաջնորդ Մահմուդ Աբբասի հետ` վստահեցնելով, որ նա տարբերակում է ահաբեկչությունն ու ծայրահեղականությունն իսլամից և իսլամական մտածողությունից:

Արաբական շատ առաջնորդներ դատապարտել են հոկտեմբերի 16-ին ֆրանսիացի ուսուցիչ Սամուել Փաթիի սպանությունը, Նիսում դրան հաջորդած սպանություններն ու երկուշաբթի երեկոյան Վիեննայում տեղի ունեցած վերջին սպանությունները, բայց խոսքի ազատության հարցում Մակրոնի դիրքորոշման բացահայտ և անուղղակի քննադատության աստիճանը որոշներին զարմացրել է, գրում է պարբերականը:

Նշվում է, որ մտահոգություն է հարուցում նաև այն, որ Թուրքիայի և Քաթարի հիմնական լրատվական գործակալությունները կարծիքներ են տարածում այն մասին, թե Ֆրանսիայում ճնշվում են  մահմեդականների իրավունքները։

Տաթև Ֆռանգյան