03.11.2026 | 23:29
Թրամփը հայտարարել է, որ ԱՄՆ-ը կդադարեցնի Իսրայելին տարեկան 4 միլիարդ դոլարի օգնության տրամադրումը
Ֆրանսիայի կառավարությունը կարող է լուծարել թուրքական «Գորշ գայլեր» ծայրահեղ ազգայնական շարժումը
Քաղաքականություն
02.11.2020 | 20:29
Ֆրանսիայի կառավարությունը չորեքշաբթի նախարարական խորհրդի նիստում կարող է հայտարարել թուրքական «Գորշ գայլեր» ծայրահեղ ազգայնական շարժման լուծարման մասին։ Այս մասին Ազգային ժողովում հայտնել է ՆԳ նախարար Ժերալ Դարմանինը, գրում է Le Figaro-ն։
Նախարարը նշել է, թե սա ագրեսիվ խմբավորում է։ Նշվում է, Դարմանինն այս մասին հայտարարել է Ֆրանսիայում մահմեդականների հետ կապված իրավիճակի պատճառով Փարիզի և Անկարայի միջև դիվանագիտական լարվածության համատեքստում:
Նշվում է, որ «Գորշ գայլերի» անդամներն ուշադրության կենտրոնում են հայտնվել անցյալ շաբաթ Լիոնի մերձակայքում գտնվող Դեսին-Շարպիե քաղաքում հայ և թուրք համայնքների միջև միջադեպերի հետևանքով։
Հիշեցնենք, որ օրերս Ֆրանսիայի Լիոն-Վալանս ավտոճանապարհին ի պաշտպանություն Արցախի ակցիա անցկացնող հայերի վրա հարձակվեցին մի քանի թուրքեր, որոնցից մեկը մուրճով հարվածեց մեր հայրենակցին, մոտ մեկ տասնյակ այլ հայեր վիրավորվեցին։ Այդ ամենից հետո թուրքական ամբոխը Լիոնի փողոցներում սպառնալիքներ էր հնչեցնում հայերի հասցեին: Արդեն երեկ ֆրանսիական Լիոն քաղաքում վանդալիզմի են ենթարկել Հայոց ցեղասպանության հուշարձանը: Պղծված հուշակոթողների վրա եղել են «Գորշ գայլեր» և «Ռեջեփ Թայիփ Էրդողան» գրությունները։
Ֆրանսիայի ՆԳ նախարարությունը քայլեր է ձեռնարկում՝ «Գորշ գայլեր» կազմակերպության գործունեությունը լուծարելու և արգելելու համար։
