ԼՂ-ում թուրքական ցանկացած խաղաղապահ դերակատարում մատնված է անհաջողության․ Թրամփի խորհրդական

ԱՄՆ նախագահի ազգային անվտանգության հարցերով խորհրդական Ռոբերտ Օ՛Բրայենը հանդիպել է Լոս Անջելեսի հայ համայնքի ներկայացուցիչների հետ, հաղորդում է «Ասպարեզ»-ը։

Օ՛Բրայենը նախ ողջունել է հայ համայնքի ներկայացուցիչներին՝ նշելով, որ հայերը նվիրված մարդիկ են և համաձայն է նախագահ Թրամփի՝ ավելի վաղ արած հայտարարությունների հետ։

Հանդիպմանը Թրամփի խորհրդականն անդրադարձել է Լեռնային Ղարաբաղի հակամարտությանը՝ ընդգծելով, որ ԱՄՆ-ն ջանքեր է գործադրում՝ այն լուծելու համար։

«Ինչպես գիտեք՝ Ադրբեջանի ուժերը հարձակվել ու վերահսկողություն են հաստատել շփման գծի հյուսիսային ու հարավային ուղղությամբ մի քանի ռազմավարական քաղաքներում։ Ադրբեջանը, օգտագործելով իր նավթային գումարները, տարիներով զենք է գնել։ Բացի այդ, նրանք տեխնիկական ու խորհրդատվություն աջակցություն են ստանում Թուրքիայի կողմից։ Չնայած Թուրքիայի բոլոր ժխտումներին, այդ թվում՝ ինձ հետ զրույցներում, ապացույցներ կան նաև մամուլում, որ Թուրքիան Սիրիայի ազատ բանակից գրոհայինների է տեղակայում հակամարտության գոտում»,- ասել է ԱՄՆ նախագահի ազգային անվտանգության հարցերով խորհրդականը։

Նա նաև խոսել է հրադադար հաստատելու երեք փորձերի մասին, որոնք ձախողվել են։

Անդրադառնալով ԼՂ հակամարտության գոտում խաղաղապահների հնարավոր տեղակայմանը՝ Ռոբերտ Օ՛Բրայենն ասել է, որ ԵԱՀԿ Մինսկի խմբի համանախագահները, այդ թվում՝ ԱՄՆ-ն, ինչպես նաև հարևան երկրները, չեն կարող միջազգային խաղաղապահների կամ դիտորդների դերակատարումը ստանձնել։

«Թուրքական ցանկացած միջնորդություն կամ խաղաղապահ դերակատարում մատնված է անհաջողության ԱՄՆ-ի, ինչպես նաև Հայաստանի համար։ Մենք հավատում ենք, որ երկու կողմերը կընդունեն սկանդինավյան խաղաղապահներին, և մենք աշխատում ենք նրանց կառավարությունների հետ՝ ուժեր հավաքելու և տարածաշրջանում հրադադարը պահպանելու համար»,- ասել է Օ՛Բրայենը։

Նա վերահաստատել է, որ հակամարտությունը ռազմական լուծում չունի և կողմերը պիտի հրադադարը պահպանեն։

«Սա հատկապես վերաբերվում է Ադրբեջանին, որն այսօր բավականին վարանում է առանց նախապայմանների հրադադարի հաստատմանը համաձայնվել»,- ասել է Ռոբերտ Օ՛Բրայանը։

Բացի այդ, նա հավելել է, որ արտաքին ուժերը որևէ դերակատարում չպիտի ունենան ԼՂ հակամարտությունում։

Էմմա Չոբանյան