Դիվերսիոն խմբերով գործողությունների անցումը պայմանավորված է ադրբեջանական կողմի կորուստներով. Արծրուն Հովհաննիսյան. ՏԵՍԱՆՅՈՒԹ

Factor.am-ի հարցազրույցը Պաշտպանության նախարարության ներկայացուցիչ Արծրուն Հովհաննիսյանի հետ:

-Պարոն Հովհաննիսյան, ի՞նչ վնասներ են հասցվել ադրբեջանական բանակին: Կան փորձագետներ, որոնց կարծիքով՝ Ադրբեջանի հարվածային ուժը ոչնչացված է, և այլևս չեն կարող առաջ անցնել:

«Ես համաձայն եմ, եթե խոսքը վերաբերում է ցամաքային ուժին: Կան միավորումներ և զորամիավորումներ, որոնք առարկայական խնդիր ունեին ճեղքում իրականացնելու: Այդպիսի զորախմբերը, որպես կանոն, 10-20 հազարանոց զորախմբեր են, որոնք ունեն հարյուրավոր զրահատեխնիկա և հրետանի, սեփական օդուժ, ԱԹՍ-ներ, դրանք լինում են կորպուսներ՝ ուժեղացված այլ միջոցներով: Նման հսկայական զորախմբերը օրական կես կամ մեկ կիլոմետր առաջ գնալու համար չեն ստեղծվում, այլ պաշտպանության «հաստ պատը» ծակելու համար են և օպերացիայի 3-րդ, 4-րդ օրը օրական մինչև 15 կմ խորանալու համար են նախատեսված:

–Ինչպես դուք եք ասում՝ հարվածային բռունցք:

-Այո, հարվածային բռունցք հասկացությունը հենց բնորոշ է նման զորախմբերին: Ադրբեջանը այս պատերազմում 2-3 նման բռունցք ուներ՝ 2-3 ուղղություններով գործելու համար: Այո՛, այս բռունցքները ջարդվել են: Այդ բռունցքները կայծակնային արագությամբ բլից-կրիգ իրականացնելու համար էին, և բլից-կրիգը տապալված է: Բայց դա չի նշանակում, որ այդ 20 հազարին սպանել ենք կամ 300 միավոր տանկերը հատ-հատ խոցել, բնականաբար ինչ-որ բան մնում է տակը, և այդ տակը մնացածը այլ ձևի ստորաբաժանում է դառնում, մի փոքր այլ խնդրով և այլ բնույթի կռիվ է սկսում: Հիմա իրենք հարավային ուղղությամբ սկսել են ճզմելու գործընթացը՝ անդադար քանակ ավելացնելով, դանդաղ հետ են մղել, որովհետև քանակական և տեխնիկական հարցերով ունեին առավելություն: Հիմա այդ ճզմող զորախումբն էլ իր հերթին մաշվել է մեր հրետանու կրակի տակ: Եվ դրանից հետո  անցել են դիվերսիոն խմբերի գործողությունների:

-Այսինքն՝ դրանք ստիպված գործողություններ են:

-Այո՛, կորուստների արդյունքում ձևավորված գործողություններ են դրանք: Ահաբեկչական խմբերը, դիվերսանտներն ավելացել են ավելի շատ: Եվ մեծ զրահատեխնիկա, անգամ մեծ ավտոմոբիլ է քիչ կիրառվում, որովհետև և՛ քանակը քիչ է, և՛ հեշտ է թիրախավորվում: Դրա համար էլ պատերազմի բնույթը կամաց կարծես փոփոխության է ենթարկվում՝ ըստ կորուստների, ըստ իրավիճակի, ըսը լուծվելիք խնդիրների և սպառազինության:

-Այդ դիվերսիոն խմբերը թիկունքը թուլացնելու խնդի՞րն են լուծում, որ հետո ձեր նշած բռունցքը կիրառվի՝ հարված հասցվի:

-Միանշանակ. Ոչ միայն թիկունքը թուլացնել, այլ նաև շրջափակման վտանգ ստեղծել, կոմունիկացիաները կտրել, խուճապ տարածել:

-Ավելի մեծ հարվածի հող են փորձում նախապատրաստել:

-Այո, իհարկե:

Ռոբերտ Անանյան