14.01.2026 | 10:17
Արարատ Միրզոյանի ասուլիսը Վաշինգտոնում. ՈՒՂԻՂ
Ֆրանսիան ակնկալում է, որ ԵՄ-ն գործողություններ կձեռնարկի Թուրքիայի դեմ
Քաղաքականություն
28.10.2020 | 13:16
Ֆրանսիան կարծում է, որ Եվրամիությունը պետք է մոտալուտ գագաթնաժողվի ժամանակ քայլեր ձեռնարկի ընդդեմ Թուրքիայի։ Այս մասին հայտարարել է Ֆրանսիայի Եվրոպայի և արտաքին գործերի նախարարի պատվիրակ-նախարար Ֆրանկ Ռիստերն Ազգային ժողովում ունեցած ելույթում, ինչպես նաև Le Figaro թերթին տված հարցազրույցում, գրում է ՏԱՍՍ-ը։
«Ողջ Եվրոպան այժմ քննադատում է Թուրքիայի նախագահ Ռեջեփ Թայիփ Էրդողանի վարքագիծը։ Անհրաժեշտ է, որ Եվրամիությունն առաջիկա գագաթնաժողովի ժամանակ նրա գործողություններին եվրոպական պատասխան տա»,- ասել է Ռիստերը։
Ազգային ժողովում ունեցած ելույթում նա առանձնահատուկ ընդգծել է, որ գագաթնաժողովը «պետք է կայացնի այնպիսի որոշումներ, որոնք նրան թույլ կտան ամրապնդել ուժերի հավասարակշռությունը Թուրքիայի հետ՝ ապագայում ավելի լավ պաշտպանելու իր շահերն ու եվրոպական արժեքները»:
Նա նշել է նաև, որ Էրդողանի ներկայիս գործողությունները համընկնում են այն քաղաքականության հետ, որն ուղղված է մի շարք հարևան տարածաշրջաններում Թուրքիայի վերահսկողությունը հաստատելուն։
«Սա մասնավորապես Լիբիային զինամթերք մատակարարելու էմբարգոյի խախտման, ինչպես նաև Լեռնային Ղարաբաղում Թուրքիայի գործողությունների շարունակությունն է, որտեղ Թուրքիան, ի աջակցություն Ադրբեջանի, վարձկաններ է ուղարկում»,- ասել է ֆրանսիացի պաշտոնյան։
Տաթև Ֆռանգյան
