14.01.2026 | 10:17
Արարատ Միրզոյանի ասուլիսը Վաշինգտոնում. ՈՒՂԻՂ
Մինչ Թուրքիան «մկաններն էր մարզում» Կովկասում, Մոսկվան հարվածեց Անկարային Իդլիբում․ Aljazeera
Քաղաքականություն
28.10.2020 | 13:01
Ռուսաստանն ու Թուրքիան նույն մետաղադրամի երկու կողմերն են․ երկուսն էլ ներգրավված են Լիբիայում, Կովկասում ու Սիրիայում ամենանշանակալից հակամարտություններում։ Նրանք շարունակում են թշնամանքը՝ աջակցելով հակադիր կողմերին՝ հուսալով ընդլայնել իրենց ռազմական ներկայությունը ու քաղաքական առավելությունները Միջերկրական ծովում ու Մերձավոր Արևելքում, գրում է Al Jazeera-ն։
Հրապարակման մեջ նշվում է, որ կողմերը մեծամասամբ միջնորդավորված պատերազմներ են վարում միմյանց դեմ, նրանց հազվադեպ կարելի է տեսնել դեմ առ դեմ, սակայն հոկտեմբերի 26-ին Ռուսաստանի կողմից մահաբեր հարվածների արդյունքում Սիրիայի հյուսիս-արևմուտքում Թուրքիայի աջակցությունը վայելող տասնյակ զինյալների ոչնչացումը զգալի լարվածության նշան է։
Վերլուծաբանները կարծում են, որ Իդլիբ նահանգում Թուրքիայի կողմից աջակցություն ստացող ամենախոշոր զինված խմբավորման ճամբարների վրա օդային հարձակումը Մոսկվայի կողմից «ուղերձ» էր Անկարային։
«Դա ոչ այնքան Ռուսաստանի կողմից Սիրիայի ընդդիմության վրա հարձակում էր, որքան անմիջական հարված և ուղերձ Թուրքիային»,- Al Jazeera-ի հետ զրույցում նման տեսակետ է հայտնել ԱՄՆ Մերձավոր Արևելքի ինստիտուտի տնօրեն Չարլզ Լիսթերը։
Իսկ թուրք վերլուծաբան Սեմիհ Իդիզը համաձայն է այն տեսակետի հետ, որ ռուսական ավիահարվածների պարագայում կարևոր է հաշվի առնել այն հանգամանքը, որ դրանք տեղի են ունեցել այն ժամանակ, երբ Անկարան «մկաններն է մարզում» Մերձավոր Արևելքում ու Կովկասում։
«Հայ-ադրբեջանական վեճն առանձնահատուկ զգայուն հարց է Ռուսաստանի համար, քանի որ այն տեղի է ունենում տարածաշրջանում, որը Մոսկվան համարում է իր հետնաբակն ու ազդեցության գոտին»,- ասել է Իդիզը։
Տաթև Ֆռանգյան
