«Սա հիմք է, որ ընդունված օրենքը հակասահմանադրական ճանաչվի»․ «Ելք»-ը չի բացառում, որ կդիմի ՍԴ

ԱԺ «Ելք» խմբակցության պատգամավոր Արտակ Զեյնալյանը Factor.am-ի հետ զրույցում, անդրադառնալով «Դատական օրենսգրքում փոփոխություններ և լրացումների կատարելու մասին» օրենսդրական փաթեթի ժամանակ տեղի ունեցած միջադեպին, ասաց, որ չի բացառվում, որ «Ելք»-ը Սահմանադրական դատարանում վիճարկի կեղծիքով ընդունված օրինագիծը։

«Ծառուկյան» դաշինքի պատգամավոր Նապոլեոն Ազիզյանի՝ սխալ քվեարկելու մասին հայտարարությունից հետո, ըստ Արտակ Զեյնալյանի, ԱԺ աշխատակարգ օրենքով Արա Բաբլոյանը պետք է կրկին քվեարկության դներ օրինագիծը, սակայն ԱԺ նախագահը հրաժարվեց դա անել։ «Մենք արձանագրեցինք, որ տեղի է ունենում քվեարկության կեղծում և սա ունի նաև իր իրավական հետևանքները։ Սահմանադրական դատարանի մասին օրենքով սա հիմք է, որ նման քվեարկության արդյունքում ընդունված օրենքը հակասահմանադրական ճանաչվի»,- ասաց «Ելք»-ի պատգամավորը։

Հարցին, թե երբ կդիմեն ՍԴ, Արտակ Զեյնալյանը պատասխանեց, որ իրենք կքննարկեն և «նպատակահարմար պահին» կհայտարարեն, թե կոնկրետ ինչ են անելու։ Իսկ արդյոք ՍԴ դիմելու հարցում «Ծառուկյան» դաշինքը կսատարի՞ «Ելք»-ին, այս հարցին ի պատասխան Զելյայանը հիշեցրեց, որ իրենք Սահմանադրական դատարան դիմելու առումով ԲՀԿ-ի հետ համագործակցության փորձ ունեն ։

«Մենք դրսևորեցինք մեր քաղաքական կամքը։ Նաև սա ուղղված է ժողովրդին՝ իշխանության տիրոջը, որը պետք է որոշի, թե խորհրդարանում ովքեր պետք է ծառայեն իրեն»,- ասաց Զեյնալյանը։

Մանրամասները դիտեք Արտակ Զեյնալյանի հետ Factor.am-ի հարցազրույցում։

Մարինե Խառատյան