19.12.2025 | 02:04
Կոնֆերենցիաների լիգա․ Վահան Բիչախչյանը՝ գոլի հեղինակ․ ՏԵՍԱՆՅՈՒԹ
Պետդումայի պատգամավորը թվարկել է ԼՂ-ում իրադարձությունների զարգացմանն ի պատասխան՝ ՌԴ-ի հնարավոր գործողությունները
Քաղաքականություն
22.10.2020 | 10:38
ՌԴ Պետդումայի ԱՊՀ հարցերով հանձնաժողովի առաջին փոխնախագահ Կոնստանտին Զատուլինը НСН-ի հետ զրույցում թվարկել է Լեռնային Ղարաբաղում իրադարձությունների զարգացմանը Ռուսաստանի արձագանքի հնարավոր տարբերակները։
Զատուլինի խոսքով՝ Ադրբեջանն ու Թուրքիան են խախտել տարածաշրջանում խաղաղությունը՝ ռազմական ռևանշի հասնելու համար, այդ պատճառով էլ անհրաժեշտ է նրանց հիշեցնել, թե որ պետությունն է հետխորհրդային տարածաշրջանում առաջատար։ Խորհրդարանականը խոստովանել է, որ վստահ չէ, թե ինչպես պետք է վարվի Մոսկվան, սակայն մի քանի տարբերակներ է առաջարկել, որոնց թվում է նաև Հայաստանում դեսանտային օպերացիայի իրականացումը։
«Հայաստանի ռազմական ներուժի ցուցադրական ամրապնդման տեսքով: ՀԱՊԿ-ին դիմելու ձևով՝ Հայաստանի, ոչ թե Լեռնային Ղարաբաղի, այլ Հայաստանի տարածքը պաշտպանելու համար միջոցներ ձեռնարկելու անհրաժեշտության պատճառով դեսանտային օպերացիայի միջոցով: Օդային շրջափակումը բացելու միջոցով: Մենք պետք է հստակ բացատրենք Վրաստանին, որ անհրաժեշտության դեպքում պետք է հանգիստ ընդունի, որ անհրաժեշտ ուժերն ու միջոցները կուղարկվեն Հայաստան իր օդային տարածքով: Սա պարտադրված որոշում է, քանի որ մենք խոսում ենք ողջ Կովկասով գրոհայինների տարածման մասին, որից կտուժեն Ռուսաստանը, Վրաստանը և մնացած բոլորը: Կա սպառնալիք հայ բնակչության մեծ զանգվածի համար, որը պատմականորեն հիշում է այս տարածաշրջանում տեղի ունեցած ցեղասպանությունը: Մենք պետք է միջոցներ ձեռնարկենք»,- հայտարարել է Զատուլինը:
Բացի այդ, պատգամավորը համաձայնել է ՀՀ վարչապետ Նիկոլ Փաշինյանի այն տեսակետի հետ, որ Ադրբեջանի գործողությունների պատճառով հակամարտությունը դեռևս դիվանագիտական լուծում չունի: Զատուլինը նաեւ ափսոսանք է հայտնել, որ բանակցային գործընթացն իրականում տեղից չի շարժվում՝ չնայած Ռուսաստանի բոլոր ջանքերին:
Տաթև Ֆռանգյան
