28.04.2026 | 10:05
Արտարժույթների փոխարժեքները՝ ապրիլի 28-ի դրությամբ
Թուրքիայի կողմից Ադրբեջան տեղափոխված ահաբեկիչները լուրջ վտանգ են ներկայացնում տարածաշրջանի համար․ Նիկոլ Փաշինյանը՝ «Իրան» պարբերականին
Քաղաքականություն
21.10.2020 | 13:38
ՀՀ վարչապետ Նիկոլ Փաշինյանը ողջունում է Իրանի կառուցողական դիրքորոշումը Հայաստանի ու Ադրբեջանի միջև շարունակվող բախումների վերաբերյալ և Իսլամական Հանրապետությունը համարում տարածաշրջանում կարևոր ու հիմնարար դերակատարում ունեցող երկիր, որը կարող է վճռորոշ դերակատարում ունենալ ռազմական գործողությունների դադարեցման գործում։ Այս մասին ՀՀ վարչապետն ասել է «Իրան» պարբերականին տված հարցազրուցում, որը ներկայացրել է IRNA գործակալությունը։
Նիկոլ Փաշինյանն ասել է, որ տարբեր երկրներ տարբեր միջոցներով փորձում են միջամտել տարածաշրջանի իրավիճակին, սակայն Հայաստանը փորձում է զերծ պահել իր բարեկամ Իրանին ամեն տեսակի վնասից։
Աղբյուրը հիշեցնում է, որ սեպտեմբերի 30-ին կայացած հեռախոսազրույցում Իրանի նախագահ Հասան Ռոհանին ու ՀՀ վարչապետ Նիկոլ Փաշինյանը մտահոգություն էին հայտնել խնդրին միջամտելու արտաքին փորձերի առնչությամբ։
Իրանական թերթի հետ զրույցում Նիկոլ Փաշինյանն ափսոսանք է հայտնել Իրանի տարածքի ականանետային հարվածների կապակցությամբ ու նշել, որ Հայաստանը ջանք չի խնայում՝ Իրանի տարածքը հարվածների հետևանքներից հեռու պահելու համար։ Նա նաև ողջունել է Իրանի կառուցողական քայլերը, որոնք կարող են օգնել՝ վերականգնել խաղաղությունն ու կայունությունը տարածաշրջանում։
Անդրադառնալով օտարերկյա միջամտությանը՝ Նիկոլ Փաշինյանն ասել է, որ Թուրքիայի կողմից Ադրբեջան տեղափոխված ահաբեկիչ վարձկանները լուրջ վտանգ են ներկայացնում տարածաշրջանի համար։ Նա ընդգծել է, որ տարածաշրջանի երկրները պիտի այդ խնդրով ավելի լուրջ զբաղվեն։
Փաշինյանը նաև նշել է, որ Ադրբեջանն օգտագործում է իսրայելական անօդաչուներ, ինչը ցույց է տալիս, որ արտաքին ուժերը տարբեր մեթոդներով միջամտում են տարածաշրջանային իրավիճակին։
Հարցին՝ ինչո՞ւ մոսկովյան հանդիպումից հետո հրադադար չի պահպանվում և ի՞նչ խոչընդոտներ կան դրա համար՝ Նիկոլ Փաշինյանը պատասխանել է, որ Թուրքիան ակնհայտորեն խոչընդոտում է հրադադարին, որովհետև ունի իր նպատակները։
Նա ընդգծել է՝ խնդիրն այն է, որ Թուրքիան ուզում է իր կայսրությունը վերակենդանացնել՝ ապահովելով իր ներկայությունն արևելքում, հյուսիսում, հարավում և ԼՂ-ի հարավ-արևելքում, ինչն ուղղակիորեն տարածաշրջանի բոլոր երկրների շահերին է անդրադառնում։
Հայաստանի վարչապետը նշել է, որ տարածաշրջանային երկրներն այս փաստը պիտի հաշվի առնեն ու համապատասխան դիրքորոշում որդեգրեն։
Էմմա Չոբանյան
