02.08.2026 | 21:08
Շոգ եղանակին՝ առավել զգոնություն. ՍԱՏՄ-ի կոչը հանրային սննդի ոլորտի ներկայացուցիչներին և միջոցառումների կազմակերպիչներին
Մինսկի խումբը պետք է ավարտի ԼՂ հակամարտության շուրջ բանակցությունները․ Էրդողան. ՏԱՍՍ
Քաղաքականություն
14.10.2020 | 17:17
Թուրքիայի նախագահ Ռեջեփ Թայիփ Էրդողանը կարծիք է հայտնել, թե ԵԱՀԿ Մինսկի խումբը պետք է ավարտի ԼՂ հակամարտության շուրջ բանակցություններն ու «Ադրբեջանին վերադարձնի իր տարածքները», փոխանցում է ՏԱՍՍ-ը։
«Ադրբեջանը միայն ցանկանում է վերադարձնել իր տարածքները, սակայն Միսնկի խումբը՝ մասնավորապես ԱՄՆ-ը, Ֆրանսիան ու Ռուսաստանը, ձգձգում են այդ գործընթացը։ Այն ամենը, ինչ Մինսկի խումբը պետք է անի՝ բանակցություններն ավարտելն ու տարածքները տիրոջը վերադարձնելն է»,- հայտարարել է Թուրքիայի ղեկավարը մեջլիսում ելույթ ունենալիս։
Փորձելով պաշտպանվել միջազգային հանրության այն մեղադրանքներից, որ Էրդողանի հովանավորությամբ Սիրիայից զինյալներ են տեղափոխվել Ադրբեջան, Թուրքիայի ղեկավարն անցել է մեղադրանքներ հնչեցնելուն․ «Ոչ ոք չի խոսում այն սպառազինության մասին, որ Հայաստան է մատակարարվում Ֆրանսիայից ու Ռուսաստանից, սակայն նրանք Ադրբեջանին մեղադրում են սիրիացի զինյալներին ներգրավելու համար։ Սիրիացիներն իրենց երկրում գործեր ունեն, նրանք չէին գնա այնտեղ»։
Հիշեցնենք, որ ինչպես ՀՀ իշխանությունները, այնպես էլ միջազգային բազմաթիվ լրատվականներ հայտարարել են, որ Թուրքիայի հետ կապված հարյուրավոր զինյալներ Սիրիայից տեղափոխվել են Լեռնային Ղարաբաղի հակամարտության գոտի՝ ամսական 1500-2000 դոլար վճարով։
Տաթև Ֆռանգյան
