Քաղաքականություն
18.12.2017 | 12:54
Հայաստան- Եվրամիություն համաձայնագրի ստորագրումը կարևոր ձեռքբերում է: Այս մասին այսօր «Քաղաքացիական հասարակության դերը Հայաստանում հանրային քաղաքականության օրակարգի ձևավորման և հաշվետու կառավարումն ապահովելու մեջ» թեմայով հանրային քննարկման ժամանակ հայտարարեց Հայաստանում ԱՄՆ դեսպան Ռիչարդ Միլսը՝ շնորհավորելով կողմերին ստորագրված փաստաթղթի համար:
Այնուհետև ԱՄՆ դեսպանն անդրադարձավ քաղաքացիական հասարակության դերին՝ համոզմունք հայտնելով, որ քաղհասարակությունը հիմնարար դեր ունի յուրաքանչյուր պետության զարգացման գործընթացում:
«Քաղհասարակությունը հսկում և պահանջում է արդյունավետ կառավարում: ԱՄՆ դեսպանատունն ակտիվորեն աջակցել է Հայաստանի կառավարությանն ու քաղհասարակությանը, ստեղծել ենք կամուրջ այն պահից սկսած, երբ ԱՄՆ-ը Հայաստանի հետ դիվանագիտական հարաբերություններ է հաստատել»,- նշեց դեսպանը՝ հավելելով, որ մի շարք աջակցության ծրագրեր կան ԱՄՆ դեսպանատան կողմից, որոնք իրական ազդեցություն կարող են ունենալ այս ոլորտում:
Ըստ Միլսի՝ Հայաստանի քաղհասարակության կազմակերպությունները վերջին 20 տարիների ընթացքում բավականին հաջողել են իրենց ներդրման տեսանկյունից՝ Հայաստանի պետական կառավարման քաղաքականության ձևավորման գործընթացում:
«Ուրախ եմ, որ կառավարությունը քայլեր է ձեռնարկել քաղաքականության քննարկումներն առավել թափանցիկ դարձնելու համար, մասնավորապես՝ էլեկտրոնային նախագծման և շրջանառման գործընթացները զարգացնելու առումով: Քաղհասարակությունը ժամանակ է ունենում հրապարակված փաստաթղթերը քննարկելու և վերլուծելու համար»,- նկատեց դեսպանը՝ հորդորելով Կառավարությանը է՛լ ավելի զարգացնել այդ գործընթացը:
ԱՄՆ դեսպանն այս համատեքստում կարևորեց նաև լրատվամիջոցների դերը:
«Որպես ժողովրդավարական պետության ներկայացուցիչ՝ ես գիտեմ, որ լրատվամիջոցները լավ չեն աշխատում, եթե կոպիտ հարցեր չեն տալիս: Լրագրողները պետք է հետևեն իրենց էթիկային՝ խուսափելով կեղծ պատումներից, չշփոթեցնել բնակչությանը: Նրանց ներկայացրած տեղեկատվությունը պետք է պարունակի ճշմարտություն»,- ասաց Միլսը:
