«Մենք «Ելք»-ի ցանկություններով չենք առաջնորդվելու». Սերգեյ Բագրատյանը չի բացառում, որ ԲՀԿ-ն նախագահի իր թեկնածուն ունենա

ԱԺ «Ծառուկյան» խմբակցության պատգամավոր Սերգեյ Բագրատյանը Factor.am-ի հետ զրույցում, անդադառնալով նախագահի թեկնածության առթիվ «Ծառուկյան» դաշինքի հետ բանակցելու «Ելք»-ի հայտարարությանը, ասաց, թե իրենք «Ելք»-ի ցանկություններով չեն առաջնորդվելու, առաջնորդվելու են «քաղաքական նպատակահարմարությամբ»:

ԱԺ «Ելք» խմբակցությունը, հիշեցնենք, հայտարարել է, որ Հայաստանի նախագահի իրենց թեկնածուն Արտակ Զեյնալյանն է:

«Արտակ Զեյնալյանը կիրթ, գրագետ, զուսպ քաղաքական գործիչ է, բայց մենք դեռ որևէ քննարկում չենք անցկացրել այդ առթիվ: Քաղաքականության մեջ ոչինչ չի բացառվում, հնարավորությունները մենք դեռ չենք քննարկել»,- ասաց Բագրատյանը:

«Ելք» խմբակցությունը նաև հայտարարեց, որ բանակցություններ է սկսում «Բարգավաճ Հայաստան» կուսակցության հետ՝ անհրաժեշտ ստորագրությունների թվաքանակն ապահովելու համար: ԲՀԿ պատգամավորը չի բացառում, որ «Ծառուկյան» դաշինքը ունենա նախագահի իր թեկնածուն. «Մենք պետք է տեսնենք, թե ինչ թեկնածու է առաջարկում ՀՀԿ-ն: Երբ որ կլինի առաջարկ, մենք կորոշենք՝ մեր թեկնածուին կառաջադրենք, թե՝ ոչ»:

Ինչ վերաբերում է նախկինում «Ծառուկյան» դաշինքի հասցեին «Ելք»-ի հնչեցրած կոշտ քննադատությանը և հարցին, թե արդյոք դա կարող է խոչընդոտ լինել համագործակցության համար, ԲՀԿ-ական պատգամավորն ասաց. «Քաղաքական նպատակահարմարությունը և քաղաքական պատեհությունը տարբեր հասկացություններ են: «Ելք»-ը քննադատել է, թե չի քննադատել, դա իր ներքին խնդիրն է: Մենք կառուցողական քննադատություն «Ելք»-ի կողմից մեր կուսակցության հասցեին չենք լսել: Խոսակցությունների, բամբասանքների մակարդակի երևույթներ են եղել ընդամենը»,- ասաց ԲՀԿ-ական պատգամավորը՝ հավելելով, թե «եթե որևէ մեկը սխալվում է, դա իր մեղքն է»:

Մանրամասները դիտեք Սերգեյ Բագրատյանի հետ Factor.am-ի հարցազրույցում:

Մարինե Խառատյան