Սրանք կարող են լինել ոչ վերջինը, Հերոստրատն էլ պատմության մեջ մնաց տաճարը վառելով. Վահրամ Բաղդասարյանը՝ ԱԱԾ հայտարարության մասին

Հանրապետական խմբակցության ղեկավար Վահրամ Բաղդասարյանի կարծիքով՝ բնական է, որ տարբեր զինված խմբավորումների  թիրախում հայտնվում է հենց իշխող ուժը: Factor.am-ի հարցին ի պատասխան՝ ՀՀԿ խմբակցության ղեկավարն ասաց՝ կարևորը Ազգային անվտանգության ծառայությունն իր տեղում է և ճիշտ ժամանակին քայլեր է ձեռնարկում:

«Երբ մեկ-երկու հոգին, 3 մլն ժողովրդից նման կերպ է մտածում, անպայման պետք է իշխանությունը սխալ լինի՞: Այդ մեկ-երկու դեպքով իշխանության աշխատանքին գնահատական չեն տալիս: Սրանք կարող են լինել ոչ վերջինը, կարող են ամբիցիոզ մարդիկ լինել, որոնք կարողանան հերոսանալ և մնալ պատմության մեջ: Հերոստրատն էլ պատմության մեջ մնաց տաճարը վառելով»,- ասաց Բաղդասարյանը:

Այսօր առավոտյան ԱԱԾ-ն հանդես եկավ հայատարարությամբ՝ տեղեկացնելով, որ իրականացված օպերատիվ-հետախուզական միջոցառումների և քննչական գործողությունների արդյունքում պարզվել է, որ ազգությամբ հայ, ԱՄՆ քաղաքացի Ռ.Ք.-ն 2017 թվականի սեպտեմբերին «Ֆեյսբուք» սոցիալական ցանցում գրանցել է «Martin Avagyan» օգտատիրոջ կեղծ տվյալներով անհատական էջը, որի միջոցով հրապարակել է նյութեր` «Մարտիկներ հանուն արդարության» անվանմամբ խմբավորում ձևավորելու, խմբավորման գործունեության մարտավարության, դրա անդամների կարգապահության, անվտանգության և գաղտնապահության կանոնների մասին: 

 Ըստ ԱԱԾ-ի՝ Նույն ժամանակահատվածում նշված անհատական էջի միջոցով տարածվել են նաև Հայաստանի Հանրապետության իրավապահ և այլ պաշտոնատար անձանց նկատմամբ բռնություն գործադրելու, պայթյուններ, հրկիզումներ իրականացնելու և այդ եղանակով համընդհանուր վախի մթնոլորտ ձևավորելու ուղղակի կոչեր:  

Factor.am-ը հետաքրքրվեց՝ հանրապետական Վահրամ Բաղդասարյանից, քանի որ այդ խմբավորման հետ առնչվող անձը հետախուզման մեջ է, ինքն, օրինակ, չի՞ վախենում:

«Այն պահից, երբ քաղաքական գործիչը պետք է վախեր ապրի նման դեպքերի հետ կապված, պետք է դադարեցնի քաղաքական գործունեությունը»,- շեշտեց ՀՀԿ խմբակցության ղեկավարը:

Մանրամասները՝ տեսանյութում:

Շողիկ Գալստյան