Ամեն օր են գողություններ լինում և ամեն դաշտում. Գագիկ Մելիքյանը՝ Սերժ Սարգսյանի հայտարարության մասին

Հանրապետական խմբակցության քարտուղար Գագիկ Մելիքյանի կարծիքով՝ նախագահ Սերժ Սարգսյանը ներել է այն համայնքապետերին, որոնք ինչ-ինչ իրավիճակում հայտնվել են իրենց կամքից անկախ:

«Ներվել են նրանք, ովքեր իրենց կամքից անկախ հայտնվել են նման իրավիճակներում, իսկ նման իրավիճակներ լինում են օրինականության դաշտից դուրս»,- Factor.am-ի հարցին ի պատասխան՝ ասաց Գագիկ Մելիքյանը:

Հիշեցնենք՝ նախագահ Սարգսյանը մասնավորապես ասել էր. «Գաղտնիք չէ, որ շատ համայնքապետներ չարաշահում են իրենց պաշտոնը և այն օգտագործում են անհասկանալի և անընդունելի եկամուտներ ունենալու համար՝ սկսած նրանից, ո՛ր տարբեր խորամանկություններով, տարբեր ձևերով օտարում են համայնքներին պատկանող հողերը, ո՛ր անազնիվ վերաբերմունք են ցուցաբերում համայնքային բյուջեների նկատմամբ, և չմանրամասնեմ, որովհետև ինձ համար շատ տհաճ է այս խոսակցությունը: Մի բան եմ, ուղղակի, ուզում ասել. շատ ներողամիտ ենք եղել համայնքապետների նկատմամբ: Ներողամիտ ենք եղել, որովհետև համարել ենք, որ պետք է կայանան, այս ինստիտուտը պետք է կայանա, և այս ընթացքում հնարավոր են որոշակի վատ դրսևորումներ: Ուզում եմ բոլորիդ, ոչ մեկին չեմ վախեցնում, ուղղակի ուզում եմ բոլորիդ զգուշացնել` եթե որևէ մեկը պետք է այս գործերով զբաղվի, ավելի լավ է գնա ուրիշ տեղ աշխատի: Մենք պատրաստ ենք, անկեղծ եմ ասում, պատրաստ ենք մեր աչքի լույսի պես ձեզ վերաբերվել, պատրաստ ենք մեր հնարավորությունների սահմանում օգնելու՝ լինի դա անձնական, թե համայնքային հարց, բայց մենք պատրաստ չենք տեսնելու, թե ձեզնից ոմանք ինչպես են մեր բնակչության փողերը տանում իրենց տուն: Ամո՛թ է»:  

Factor.am-ի դիտարկմանը՝ ընդդիմադիրները պնդում են, որ ներվել են այն համայնքապետերը, որոնք լավ ընտրակաշառք են բաժանել, Մելիքյանը հակադարձեց. «Ընդդիմադիրրները չարաչար սխալվում են»:
Ըստ Գագիկ Մելիքյանի՝ գողությունը ծնվել է մարդկության հետ միասին, մարդկության հետ էլ կվերանա. «Ամեն օր են գողություններ լինում և ամեն դաշտում»:

Մանրամասները՝ տեսանյութում:

Շողիկ Գալստյան