Քաղաքական իրական այլախոհությունը Հայաստանում համարվում է հանցագործություն․ իրավապաշտպաններ

«Հայաստանի Հանրապետությունում դատարանը ենթակա է քաղաքական իշխանություններին և Դատախազությանը, և բնական է՝ մենք նման նախադեպեր չենք էլ ունենալու»,- անդրադառնալով Միխեիլ Սաակաշվիլիի՝ Կիևի դատարանից ազատ արձակմանը, Factor.am-ին ասաց իրավապաշտպան Վարդան Հարությունյանը։

Իրավապաշտպանը նշեց՝ Ուկրաինան ազատ երկիր է, որտեղ դատարանն անկախ է և կայացնում է իր վճիռը․ «Ես դեռևս ականատես չեմ եղել, որ Հայաստանի դատարանը չհաստատի Դատախազության, կամ իշխանությունների կողմից թելադրված որոշումը»։

Հարցին, արդյոք ՀՀ-ԵՄ համաձայնագրի՝ դատաիրավական բարեփոխումներին ուղղված կետերը կյանքի կկոչվեն, իրավապաշտպանը նշեց․ «Դա դաստիարակության, կրթության աշխարհընկալման խնդիր է, որը մեր իշխանությունները չունեն։ Նրանք այդ փաստաթուղթը ստորագրել են՝ նախապես իմանալով, որ չեն իրականացնի»։

Նշենք, որ Ուկրաինայի իշխանությունները Միխեիլ Սաակաշվիլիին մեղադրում են հանցավոր կազմակերպությունների հետ համագործակցելու և նրանց հանցավոր գործունեությունը թաքցնելու մեջ: Վրաստանի նախկին նախագահին երեկ հենց դատարանի դահլիճից ազատ արձակեցին։

ԳԽ նախկին պատգամավոր Ազատ Արշակյանը՝ նշում է Հայաստանին չի «սպառնում» Ուկրաինայի դատարանի օրինակը․ «Մինչև հիմա չի եղել այդպիսի բան, այդպես վարվելու պատճառները դեռ չեն վերացվել։ Բոլոր քաղաքական կասկածյալներին պատժում են, այսինքն՝ քաղաքական իրական այլախոհությունը Հայաստանում համարվում է հանցագործություն։ Քանի դեռ մենք ապրում ենք եվրասիական արժեքային համակարգում, Ոսկե հորդայի հետնորդի ժառանգություն-պետությունում քաղաքական այլախոհությունը, կամ ընդդիմությունը հանցագործություն է և պետք է անպայման պատժվի»։

Նախկին պատգամավորի խոսքով՝ ազատ դատարաններ կունենանք այն ժամանակ, երբ մեր երկիրը կազատվի Ոսկե հորդայի լծից։

Լիլիթ Շաբոյան