Շատ վատ են անում, որ բյուջեից գողանում են. գլխավոր գանձապետ

ՀՀ ֆինանսների նախարարի առաջին տեղակալ, գլխավոր գանձապետ Ատոմ Ջանջուղազյանը չի ճանաչում գող համայնքապետերին և տեղյակ չէ համայնքային բյուջեների թալանից: Այս մասին այսօր խորհրդարանում լրագրողների հետ զրույցում հայտարարեց Ֆինանսների փոխնախարարը:

Հիշեցնենք՝ նախագահ Սարգսյանը մասնավորապես ասել էր. «Գաղտնիք չէ, որ շատ համայնքապետներ չարաշահում են իրենց պաշտոնը և այն օգտագործում են անհասկանալի և անընդունելի եկամուտներ ունենալու համար՝ սկսած նրանից, ո՛ր տարբեր խորամանկություններով, տարբեր ձևերով օտարում են համայնքներին պատկանող հողերը, ո՛ր անազնիվ վերաբերմունք են ցուցաբերում համայնքային բյուջեների նկատմամբ, և չմանրամասնեմ, որովհետև ինձ համար շատ տհաճ է այս խոսակցությունը: Մի բան եմ, ուղղակի, ուզում ասել. շատ ներողամիտ ենք եղել համայնքապետների նկատմամբ: Ներողամիտ ենք եղել, որովհետև համարել ենք, որ պետք է կայանան, այս ինստիտուտը պետք է կայանա, և այս ընթացքում հնարավոր են որոշակի վատ դրսևորումներ: Ուզում եմ բոլորիդ, ոչ մեկին չեմ վախեցնում, ուղղակի ուզում եմ բոլորիդ զգուշացնել` եթե որևէ մեկը պետք է այս գործերով զբաղվի, ավելի լավ է գնա ուրիշ տեղ աշխատի: Մենք պատրաստ ենք, անկեղծ եմ ասում, պատրաստ ենք մեր աչքի լույսի պես ձեզ վերաբերվել, պատրաստ ենք մեր հնարավորությունների սահմանում օգնելու՝ լինի դա անձնական, թե համայնքային հարց, բայց մենք պատրաստ չենք տեսնելու, թե ձեզնից ոմանք ինչպես են մեր բնակչության փողերը տանում իրենց տուն: Ամո՛թ է»: 

Լրագրողները գլխավոր գանձապետից հետաքրքրվեցին՝ արդյոք արդյունավե՞տ են ծախսվում համայնքային բյուջեները, Ջանջուղազյանը պատասխանեց. «Եթե իմանամ որևէ անարդյունավետ ծախսի մասին, ապա այն կդադարի անարդյունավետ ծախս լինել: Մեր խնդիրն այն է, որ ջանքեր ձեռնարկենք, որ անարդյունավետ ծախս չլինի»:

Ֆինանսների նախարարի առաջին տեղակալի խոսքով՝ համայնքներին տրամդրվող գումարը քիչ է, ավելին՝ նա գտնում է, որ տարածքային համաչափ զարգացման խնդիր կա հանրապետությունում:

«Ոչ մի ծախս, չեմ կարծում, որ բավարար է նպատակների իրականացման համար: Մեր կարիքները՝ բոլոր ուղղություններով, անհամեմատ ավելի մեծ են, քան բյուջեն հնարավորություն ունի, կան նաև սահմանափակումներ»,- հավելեց Ատոմ Ջանջուղազյանը:

Մանրամասները՝ տեսանյութում: