12.10.2026 | 21:17
Հայաստանի մի շարք հասցեներում էլեկտրաէներգիայի անջատումներ կլինեն
Շիրակի մարզի դպրոցների 30 աշխատակցի մոտ կորոնավիրուս է հաստատվել․ Ախուրյանի թիվ 2 դպրոցն անցել է հեռավար ուսուցման
25.09.2020 | 19:29
Շիրակի մարզում շարունակվում է դպրոցների աշխատակիցների թեստավորման գործընթացը։ Երեկվա դրությամբ՝ թեստավորվել է դպրոցների աշխատակիցների 40 տոկոսը՝ 2․229 հոգի, որոնցից 30-ի մոտ կորոնավիրուս է հաստատվել։ Այս մասին Factor.am-ի հետ զրույցում ասաց Շիրակի մարզպետարանի առողջապահության և սոցիալական ապահովության վարչության պետի ժամանակավոր պաշտոնակատար Լեյլի Ասլանյանը։
Նա նշեց, որ թիվն անհանգստացնող չէ, քանի որ կազմում է թեստավորվածների ընդհանուր թվի 1․3 տոկոսը միայն։
Այնուամենայնիվ, թեստավորման արդյունքում Ախուրյանի թիվ 2 դպրոցում կորոնավիրուսի դեպքեր են հաստատվել ու մտահոգիչ պատկեր է արձանագրվել։
«Ախուրյանի թիվ 2 դպրոցում սկզբում 3 հոգու մոտ էր հայտնաբերվել, իրենց շփման շրջանակն էին հստակեցրել, 15 ուսուցիչ ու 157 աշակերտ մեկուսացվել էր։ Բայց երեկ նորից մեկուսացվեցին։ Շփման շրջանակով ուրիշ ուսուցիչների մոտ էլ հայտնաբերվեցին, ջերմողներ ի հայտ եկան»,- ասաց Լեյլի Ասլանյանը։
Այս ամենը հաշվի առնելով՝ որոշում է կայացվել ու դպրոցն ամբողջովին անցել է հեռավար ուսուցման։
«Երեկվանից Ախուրյանի թիվ 2 դպրոցում արդեն հեռավար դասընթաց է կազմակերպվում։ Ըստ ուղեցույցի, երբ ուսուցիչների 10 տոկոսի դրական պատասխան կա, շարժվում ենք ըստ կանոնակարգի ու կազմակերպում հեռավար ուսուցում»,- մեզ հետ զրույցում ասաց Շիրակի մարզպետարանի կրթության, մշակույթի և սպորտի վարչության պետ Հրայր Կարապետյանը։
Նա նաև նշեց, որ Շիրակի մարզում առայժմ միայն Ախուրյանի նշված դպրոցն է անցել հեռավար ուսուցման։
Շիրակի մարզում, ընդհանուր առմամբ, կորոնավիրուսի առաջնակի դեպքերը տատանվում են 10 տոկոսի շրջանում։
«Գյումրու ինֆեկցիոնի տրիաժում 8 հիվանդ կա կորոնավիրուսի կասկածով, տնային մեկուսացած 462 հոգի ունենք, որից 111-ն է դրական պատասխանով»,- ասաց Լեյլի Ասլանյանը։
Հավելենք, որ, ընդհանուր առմամբ, Շիրակի մարզում 160 դպրոցի 5․848 աշխատակից է թեստավորվելու։
Էմմա Չոբանյան
