Իսրայելական ռազմարդյունաբերական ընկերությունը 155 մլն դոլար է փոխանցել Ադրբեջանում փողերի լվացման հետ կապված երկու ընկերության․ Haaretz

Իսրայելական խոշորագույն՝ Aerospace Industries ընկերությունը 155 մլն դոլար է փոխանցել երկու ընկերությունների, որոնց անունները կապվում են Ադրբեջանի կառավարության համար փողերի մեծամասշտաբ լվացման գործունեության հետ՝ համաձայն 2012-2014 թվականների բանկային հաշվետվությունների։ Այս մասին գրում է իսրայելական Haaretz պարբերականը՝ վկայակոչելով Մեդիայի և ժողովրդավարության կենտրոնը։

Լրատվամիջոցի հաղորդմամբ՝ այս պատմությունն ի հայտ է եկել հազարավոր բանկային փաստաթղթերի արտահոսքի շնորհիվ, որոնք հայտնվել են Հետաքննող լրագրողների կոնսորցիումի ձեռքում։ Վճարումների պատճառը պետական ընկերության կողմից հայտնի չէ։

Հետաքննությունը ցույց է տվել, որ գումարի փոխանցումները սկսվել են այն բանից հետո, երբ IAI-ն Ադրբեջանի հետ կնքել է 1․6 մլրդ դոլարի զենքի վաճառքի գործարքը, որը պատմության մեջ խոշորագույններից է։ Գործարքին ծանոթ աղբյուրն էլ ասել է, որ, ըստ իր տեղեկությունների, փոխանցված գումարը չի ներառել միջնորդավճարները։

Իսրայելական ընկերությունից էլ այս ամենի հետ կապված հետևյալ պատասխանն են տվել․ «Aerospace Industries-ը պետական ընկերություն է, որը խստորեն աշխատում է օրենքին համապատասխան։ Որպես պաշտպանական, ռազմական ընկերություն, հետևելով ընկերության քաղաքականությունը, չի պատասխանում իր բիզնես գործունեության վերաբերյալ տեղեկություններին, եթե օրենքով նախատեսված չէ»։

Haaretz գրում է նաև, որ, մասնավորապես, Deutsche Bank-ի հաշվետվության մեջ, IAI-ի հետ փոխկապակցված, նշվում են իսրայելական ու արտասահմանյան բանկերը, որոնց միջոցով արվել են այնպիսի հաճախորդների վճարումներ, ինչպիսիք են Alitalia-ն, Indian Aerospace Industries-ը, RwandAir-ը, Ethiopian Airlines-ը, Russia’s Rossiya Airlines-ը և այլն։

Հաշվետվության մեջ նաև այն ընկերություներն են, որոնց IAI-ն փոխանցումներ է արել։ Դրանցից առանձնանում են Jetfield Networks-ը և Larkstone-ը։

2009 թվականի Նոր Զելանդիայում հիմնադրված Jetfield-ը 3 տարի անց տեղափոխվել է Մարշալյան կղզիներ։ Ընկերության սեփականատերը ոմն Ջավիդ Հուսեյնովն է, որը ծնվել է 1961 թվականին Ադրբեջանում։ Jetfield-ի տեղափոխումը Մարշալյան կղզիներ պաշտոնական դարձավ 2012-ի փետրվարին, երբ իսրայելական ու միջազգային ԶԼՄ-ը հաղորդեցին IAI-ի ու Ադրբեջանի կառավարության միջև կնքված պայմանագրի մասին, որի մեծ մասը հասարակությունից թաքուն է պահվել։ Իսրայելն Ադրբեջանից նավթ է գնում, իսկ Ադբեջանն Իսրայելից՝ զենք ու գյուղտեխնիկա։

Իսրայելական ու միջազգային լրատվամիջոցների հաղորդմամբ՝ այս գործարքը ներառում էր անօդաչու թռչող սարքերի ու հակահրթիռային պաշտպանական համակարգերի վաճառք։ Ադրբեջանի համար այս գործարքն աննախադեպ ծավալների էր՝ կազմում էր երկրի պաշտպանական բյուջեի 3․2 մլրդ դոլարի կեսը։

Jetfield-ին վճարումները սկսվել են 2012 թվականին, Ադրբեջանի հետ գործարքի կնքումից ամիսներ անց։ Հոդվածում ներկայացվում են փոխանցումների մանրամասները։

Միաժամանակ, նշվում է, որ Jetfield-ի և Larkstone-ի գումարային փոխանցումները հարցեր են առաջացնում, քանի որ այս ընկերությունները կապված են «Ադրբեջանական լվացքատան» կոռուպցիոն սկանդալի հետ, ըստ որի՝ ադրբեջանական ռեժիմի հետ կապված 4 ընկերությունների միջոցով, որոնք գրանցված են Մեծ Բրիտանիայում, փողեր են լվացվել։ Jetfield-ը և Larkstone-ն այդ ընկերությունների թվում են։

Էմմա Չոբանյան