Թրամփը մայիսին կարող է Թուրքիա այցելել

ԱՄՆ նախագահ Դոնալդ Թրամփը դիտարկում է հաջորդ ամիս Մերձավոր Արևելք կատարելիք շրջագայության շրջանակում, Սաուդյան Արաբիա, Կատար և ԱՄԷ այցելություններից հետո, նաև Թուրքիա մեկնել, հայտնում է CNN Arabic-ը։

Լրատվամիջոցի աղբյուրների համաձայն՝ չի սպասվում, որ ԱՄՆ նախագահն այդ ուղևորության ընթացքում կայցելի նաև Իսրայել։ Աղբյուրները հայտնել են, որ վերջնական որոշում դեռևս չի կայացվել, մանրամասները ճշտվում են։

Սպիտակ տան բարձրաստիճան պաշտոնյան CNN-ին ասել է, որ Թրամփը քննարկել է այցը Թուրքիայի նախագահ Ռեջեփ Թայիփ Էրդողանի հետ վերջերս տեղի ունեցած հեռախոսազրույցի ժամանակ։

Ավելի վաղ լուրեր էին շրջանառվում Էրդողանի՝ ԱՄՆ հնարավոր այցի մասին։ Այնուամենայնիվ, նրա այցի ծրագրերը դեռևս չեն որոշվել՝ հաստատված ամսաթիվ չկա։

Միևնույն ժամանակ, չորեքշաբթի CNN Turk-ին տված հարցազրույցում Էրդողանի՝ ԱՄՆ հնարավոր այցի մասին հարցին Թուրքիայի արտգործնախարար Հաքան Ֆիդանը պատասխանել էր. «Նախապատրաստական ​​​​աշխատանքներն այսպիսին են. սա այն հարցն է, որի վերաբերյալ առաջնորդները հայտարարել են իրենց կամքը: Մենք այժմ քննարկում ենք, թե երբ և որտեղ դա տեղի կունենա»:

Տեղի ունենալու դեպքում սա կլինի նախագահի պաշտոնում Թրամփի առաջին այցը Թուրքիա։ Նրա նախորդները՝ Ջորջ Բուշ կրտսերը և Բարաք Օբաման, այցելել են երկիր, համապատասխանաբար, 2004 և 2009 թվականներին։ 2015 թվականին նույնպես Բարաք Օբաման եղել է Թուրքիայում, սակայն G20-ի գագաթնաժողովին մասնակցելու նպատակով։

Թարգմանությունը՝ Էմմա Չոբանյանի