22.04.2026 | 23:30
ՀՀ տարածքում ավտոճանապարհները հիմնականում անցանելի են
Սարերում կրակոցի ձայներ լսվում են, վտանգավոր բան չկա․ Չինարիի վարչական ղեկավար
11.04.2025 | 14:10
«Գյուղի ուղղությամբ կրակոցներ չկան, բայց հեռվից կրակոցների ձայներ են լսվում»,- Factor.am-ի հետ զրույցում նշեց Բերդ խոշորացված համայնքի Չինարի սահմանամերձ բնակավայրի վարչական ղեկավար Սամվել Սաղոյանն՝ անդրադառնալով համայնքի բնակիչների լրատվամիջոցներին փոխանցած տեղեկություններին, թե վերջին շրջանում ակտիվացել են կրակոցները։
«Հեռվից՝ սարերում, քոլերում ձայներ լսվում են, էտա։ Վտանագավոր բան չկա։ Գյուղի ուղղությամբ կրակոցներ չկան, գյուղի մոտիկ պոստերում չկա: Էլի նորմալ է, ամեն ինչ լավ է»,- կարճ պատասխանեց Սաղոյանը։
Ներքին Կարմիրաղբյուրի վարչական ղեկավար Լևոն Առաքելյանն էլ հերքեց տեղեկությունները, որ իրենց շրջանում կրակոցների ձայներ են լսում։
«Չկա նման բան։ Որ կրակոցի ձայներ լսեմ, ո՞նց կարամ հերքեմ։ Գյուղացիները որտեղի՞ց են ձայներ լսել, եթե ես չեմ լսել։ Կարող է՝ կողքի գյուղերում լսվում է, ես չեմ կարող ասել»,- հայտնեց նա։
Հիշեցնենք, որ շաբաթներ շարունակ Ադրբեջանը տեղեկություններ է տարածում, իբր, հայկական կողմից կրակում են։ Այսօր ևս ադրբեջանական կողմն ապատեղեկատվություն է տարածել` նշելով, թե ՀՀ ԶՈՒ ստորաբաժանումները կրակ են բացել սահմանագոտու հյուսիսարևելյան հատվածում տեղակայված ադրբեջանական դիրքերի ուղղությամբ, ինչը պաշտոնական Երևանը հերքել էր։
Հայաստանի պաշտպանական գերատեսչությունից նաև հայտնում են, որ սահմանագծի երկայնքով երբեմն արձանագրվում են անկանոն, ոչ թիրախային կրակոցներ։
Մանյա Պողոսյան
