19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Բելառուսի ընդդիմությունը սահմանադրական փոփոխությունների մշակում է նախաձեռնել
Քաղաքականություն
22.09.2020 | 17:37
Բելառուսի ընդդիմությունը Ընտրական օրենսգրքի նոր խմբագրման և Սահմանադրության փոփոխությունների մշակման գործընթաց է նախաձեռնել։ Այս մասին տեղեկացնում է ՏԱՍՍ-ը։
««Եվրոպական երկխոսություն» կենտրոնի տնօրեն Անատոլի Լեբեդկոն, Սվետլանա Տիխանովսկայայի շտաբի հետ համաձայնեցմամբ, Ընտրական օրենսգրքի նոր խմբագրության և Բելառուսի Սահմանադրության փոփոխությունների գործընթաց է նախաձեռնել»,- ասվում է հաղորդագրությունում։
Նախաձեռնության հեղինակները նշել են, որ բողոքի ակցիաների մասնակցող բելառուսների հիմնական պահանջը նոր ընտրությունների անցկացումն է։
«Ժողովրդի բոլոր պահանջների բավարարման համար հարթակ ստեղծելու նպատակով է այս նախաձեռնությունը։ Փոփոխություններ կատարելու առաջարկների քննարկման համար Լեբեդկոն հրավիրել է Բելառուսի բոլոր կուսակցությունների և շարժումների ներկայացուցիչներին։ Առաջին կազմակերպական նիստն արդեն տեղի է ունեցել, քննարկվել են նախաձեռնող խմբի կապի միջոցները»,- հավելել են ընդդիմության ներկայացուցիչները։
Ավելի վաղ Բելառուսի նախագահ Ալեքսանդր Լուկաշենկոն առաջարկել էր Սահմանադրությունում փոփոխություններ կատարել՝ տարբեր աստիճանի իշխանությունների լիազորությունները վերաբաշխելու և իրավունքների մի մասը «ներքև» փոխանցելու համար։ Նա նշել է, որ նոր Սահմանադրությունը պետք է ընդունվի հանրաքվեով։ Լուկաշենկոն չէր բացառել Սահմանադրության ընդունումից հետո արտահերթ նախագահական ընտրությունների անցկացումը։
