ՌԴ-ում մեկնարկել են տարվա խոշորագույն ռազմավարական զորավարժությունները․ մասնակցում է նաև Հայաստանը

ՌԴ հարավային զորավարժարաններում այսօր մեկնարկել են «Կովկաս-2020» խոշորագույն ռազմավարական զորավարժությունները, որոնցում ներգրավված է շուրջ 80 հազար մարդ, այդ թվում՝ 12․900 զինվորական, գրում է DW-ի ռուսական ծառայությունը։

Զորավարժություններին մասնակցում են զինվորականներ, մասնավորապես, Հայաստանից, Չինաստանից, Բելառուսից, Պակիստանից ու Մյանմարից։

Վարժանքների առաջին փուլում կմշակվի մասնակից երկրների միջև փոխգործակցությունը, երկրորդ փուլում կլուծվեն համատեղ ռազմական գործողությունների ժամանակ առաջացած կառավարման խնդիրները։

Զորավարժությունները կտևեն մինչ սեպտեմբերի 26-ը։ Դրանք կանցկացվեն Հարավային ռազմական շրջանի զորավարժարաններում՝ Պրուդբոյ, Աշուլուկ, Կապուստին Յար, ինչպես նաև Արզգիրի և Կոպանի ավիացիոն զորավարժարաններում։

Նշենք, որ զորվարժություններին մասնակցելուց հրաժարվել է միանգամից երկու պետություն՝ Հնդկաստանն ու Ադրբեջանը։

Նյու Դելիում պարզաբանել են, թե զինվորականները չեն մասնակցի զորավարժություններին համաճարակի և դրա հետ կապված լոգիստիկ խնդիրների պատճառով։ Սակայն The Times of India-ն իր հերթին նշում է, որ նման որոշում է կայացվել, քանի որ զորավարժություններին պետք է մասնակցեն զինվորականներ նաև Չինաստանից ու Պակիստանից։ Բանն այն է, որ հունիսին Հնդկաստանի ու Չինաստանի միջև վերջին տասնամյակում առաջին անգամ գրանցված բախումների արդյունքում եղան զոհեր, և տարածաշրջանում լարվածությունը կտրուկ մեծացավ։

Իսկ ավելի ուշ զորավարժություններին մասնակցելուց, առանց բացատրությունների, հրաժարվեց նաև Ադրբեջանը՝ հայտարարելով, որ միայն դիտորդների կուղարկի։