06.11.2026 | 21:13
Թուրքիայում ֆոնդերի սկանդալի գործով ձերբակալվել է Էրդողանի թիմակից նախկին նախարարը
Մարիա Կոլեսնիկովային մեղադրանք է առաջադրվել․ նա կրկին հարցաքննվել է
Քաղաքականություն
17.09.2020 | 17:00
Բելառուսի ընդդիմության Համակարգող խորհրդի նախագահության անդամ Մարիա Կոլեսնիկովային երկրի պետական իշխանության զավթման կամ սահմանադրական կարգը բռնի փոփոխելու հրապարակային կոչերի մեղադրանք է առաջադրվել։ Այս մասին հայտնել է Բելառուսի Քննչական կոմիտեն։
Այս հոդվածով մեղադրանքը ենթադրում է պատասխանատվություն՝ 2-ից 5 տարի ժամկետով ազատազրկման տեսքով։ Հետաքննությունը շարունակվում է։
«Эхо Москвы» ռադիոկայանի եթերում Կոլեսնիկովայի փաստաբան Լյուդմիլա Կազակը հայտնել է, որ իր պաշտպանյալին մեղադրանք առաջադրելուց հետո հարցաքննել են։
Կազակը հավելել է, որ Մարիա Կոլեսնիկովայի ինքնազգացողությունը վերջին օրերին բարելավվել է, նա չի զղջում, որ չի հեռացել Բելառուսից։
«Նա չի զղջում, որ մնացել է Բելառուսում՝ պատռելով անձնագիրը։ Իհարկե, նա հասկանում էր՝ իրեն ինչ է սպառնում, բայց հանուն այն նպատակի, որ հետապնդում է, նա պատրաստ է տանել ավելին և բոլորին երախտագիտություն է հայտնում»,- ասել է Լյուդմիլա Կազակը։
Հիշեցնենք, որ Մարիա Կոլեսնիկովան ձերբակալվել է սեպտեմբերի 7-ի լույս 8-ի գիշերը։ Բելառուսի Պետական սահմանային կոմիտեի տվյալներով՝ ընդդիմադիր գործիչը ձերբակալվել է Ուկրաինայի հետ սահմանն անօրինական հատելիս։
Հավելենք նաև, որ իշխանության զավթման կոչերի գործով ձերբակալված են նաև Համակարգող խորհրդի նախագահության անդամ Մաքսիմ Զնակը և խորհրդի շտաբի իրավաբան Իլյա Սալեյը։
