Նավալնին հրաժարվել է համագործակցել ՌԴ-ի հետ իրավական օգնության հարցով

Ռուսաստանցի ընդդիմադիր Ալեքսեյ Նավալնին, որը թունավորումից հետո բուժում է անցնում բեռլինյան «Շարիտե» կլինիկայում, Գերմանիայի դատախազության ներկայացուցչի հետ զրույցում հրաժարվել է իրավական օգնություն ցուցաբերելու հարցում ռուսական կողմի հետ համագործակցությունից։ Այս մասին գրում է DW-ի ռուսական ծառայությունը՝ վկայակոչելով NYT պարբերականը։

«Նա ամբողջությամբ տեղեկացված է իր վիճակի մասին, լիարժեք գիտակցում է՝ ինչ է տեղի ունեցել և որտեղ է գտնվում»,- The New York Times-ին ասել է Գերմանիայի անվտանգության մարմինների բարձրաստիճան պաշտոնյան, որը չի ցանկացել հրապարակել անունը։

Նշվում է, որ Նավալնու հետ զրույցը տեղի է ունեցել մի քանի ժամ անց այն բանից հետո, երբ Ֆրանսիայի և Շվեդիայի լաբորատորիաները հաստատել են բունդեսվերի եզրահանգումը, որ ընդդիմադիր գործիչը թունավորվել է «Նովիչոկ»-ով։

«Այս փուլում երեք՝ իրարից անկախ լաբորատորիաներ ապացույցներ են ներկայացրել, որ «Նովիչոկ» խմբի նյութն է Նավալնու թունավորման պատճառը։ Մենք կրկին կոչ ենք անում Ռուսաստանին՝ բացատրել, թե ինչ է տեղի ունեցել»,- ասել է Գերմանիայի կառավարության պաշտոնական ներկայացուցիչ Շտեֆեն Զայբերգը։

Ալեքսեյ Նավալնին շարունակում է հիվանդանոցում ուժեղացված հսկողության տակ մնալ։ Գերմանիայի անվտանգության մարմինների ներկայացուցիչն ասել է, որ ապաքինումից հետո նա պատրաստվում է Ռուսաստան վերադառնալ։

«Նա չի պատրաստվում Գերմանիայում մնալ, ցանկանում է վերադառնալ տուն՝ Ռուսաստան, և ուզում է շարունակել իր առաքելությունը»,- ասել է նա։