Միայն կարտոֆիլ օգտագործող ընտանիքները միևնույն է չեն կարող միս գնել. Խոսրով Հարությունյան

Հանրապետական խմբակցության պատգամավոր Խոսրով Հարությունյանը չի հերքում՝ Հայաստանում կան աղքատներ, որոնք, ըստ պատգամավորի, չեն կարող օգտվել մի շարք ապրանքատեսակներից՝ անկախ դրանց գնից:

«Պատկերացրեք՝ կա ընտանիք, որը միայն կարտոֆիլ է օգտագործում: Հիմա եթե միսը թանկ է կամ էժան, ինքը միևնույն է գումար չունի միս գնելու, շարունակում է կարտոֆիլ օգտագործել»,- փորձելով պարզաբանել ՀՀԿ-ական պատգամավոր, առողջապահության և սոցիալական հարցերի մշտական հանձնաժողովի նախագահ Հակոբ Հակոբյանի հայտարարությունը՝ Factor.am-ի հետ զրույցում ասաց Խոսրով Հարությունյանը:

Նկատենք՝ երեկ հանրապետական պատգամավոր Հակոբ Հակոբյանն ուշագրավ հայտարարություն էր արել՝ նշելով. «Աղքատը քիչ է ծախսում, հետևաբար թանկացումը բերում է նրան, որ աղքատը ստիպված, ինքնաբուխ ձևով խուսափելու է թանկացած ապրանքներից: Պետական քաղաքականությունն էլ նրա համար է, որ եթե թանկացումը աղքատ շերտին կարողանա հարվածել, ապա նրանց պետք է պաշտպանել թանկացումներից: Հիմա դրա կարիքը չկա, որ պետությունն անդրադառնա դրան: Աղքատ մարդկանց մոտ սովորություն կա, որ նրանք խուսափում են թանկացած կամ թանկ ապրանք գնելուց»:

Factor.am-ը Խոսրով Հարությունից հետաքրքրվեց՝ կիսո՞ւմ է Հակոբ Հակոբյանի տեսակետը: «Դա փաստ է, դիրքորոշման խնդիր չկա: Ես շատ պարզ բան եմ ասում՝ անկասկած կա սպառողների մի խավ, որոնց եկամուտների ծավալը բավական ցածր է, այնքան ցածր է, որ անկախ ապրանքների գնից, ի վիճակի չեն այդ ապրանքատեսակներն օգտագործել իրենց ամենօրյա զամբյուղում»,- նշեց իշխող ուժի ներկայացուցիչը:

Մանրամասները՝ տեսանյութում      

Շողիկ Գալստյան