ՌԴ-ի դեմ ագրեսիայի դեպքում Բելառուսը կպատերազմի Արևմուտքի հետ․ Լուկաշենկո

Բելառուսը պատերազմի մեջ կմտնի, եթե արևմտյան երկրների կողմից Ռուսաստանի դեմ ագրեսիա սկսվի։ Ռուսական լրատվամիջոցների հետ հարցազրույցում այս մասին հայտարարել է Բելառուսի նախագահ Ալեքսանդր Լուկաշենկոն, գրում է ՏԱՍՍ-ը։

«Եթե Բելառուսի միջոցով կամ Բելառուսի հարևանությամբ որևէ մեկը ագրեսիա իրականացնի Ռուսաստանի դեմ, բելառուսական բանակը՝ 60 հազար սվին, պատերազմի մեջ կմտնի։ Եթե հանկարծ դա տեղի ունենա արևմտյան ուղղությամբ, հյուսիսային կամ հարավային, մենք անհապաղ կպաշտպանենք Ռուսաստանին»,- մասնավորապես, ասել է Լուկաշենկոն։

Նրա խոսքով՝ Բելառուսն ուժեղացրել է իր սահմանների պաշտպանությունը բոլոր ուղղություններով՝ բացառությամբ Ռուսաստանի հետ սահմանի։

«Փորձեցին մեզ մի փոքր խտղտացնել, ինչպես հիմա հասկանում եմ։ Այն ժամանակ ես դա լուրջ ընդունեցի՝ Բելառուսի հետ սահմանին տարատեսակ զորավարժությունները։ Եվ, իհարկե, ստիպված էի բելառուսական բանակի կեսը մոբիլիզացնել՝ դրան դիմակայելու համար։ Մենք նույնիսկ ուժեղացրեցինք սահմանի պաշտպանությունը ուկրաինական ուղղությամբ»,- ասել է Լուկաշենկոն։

Ավելի վաղ Ալեքսանդր Լուկաշենկոն Բելառուսի Պաշտպանության նախարարությանը հանձնարարել էր ուշադիր հետևել Լեհաստանում և Լիտվայում ՆԱՏՕ-ի զորքերի տեղաշարժին, ինչպես նաև երկրի արևմտյան սահմանին զորքերը լիարժեք մարտական պատրաստության բերել՝ նշելով այդ շրջանում բացասական իրադրության մասին։