Ե՞րբ եք գնացել Վարդաշենի շենքեր, տեսել՝ մարդիկ ինչպես են ապրում. ավագանու ԲՀԿ-ական անդամը բարկացավ. ՏԵՍԱՆՅՈՒԹ

Երևանի ավագանին քննարկում է «Երևանի կենդանաբանական այգի» համայնքային ոչ առևտրային կազմակերպության կանոնադրության մեջ փոփոխություն կատարելու մասին» նախագիծը, որով առաջարկվում է ստեղծել կառավարման խորհուրդ, որի անդամները ամիսը մեկ անգամ պետք է հավաքվեն և մոնիթորինգի ենթարկեն այգու տնօրենի կատարած աշխատանքը:

Նախագիծն ավագանու նիստին ներկայացրեց հեղինակը, ավագանու «Իմ քայլը» խմբակցության անդամ Արման Անտոնյանը։ Ավագանու ԲՀԿ խմբակցության անդամ Արմեն Ներսիսյանին բարկացրեց Անտոնյանի երկար ելույթը․ «Ես բազմիցս այցելել եմ Կենդանաբանական այգի, հիմա շատ լավ կառավարվում է, շատ լավ վիճակում է, կարծում եմ՝ պետք չի, որ դուք 40 րոպե բոլորին պատմեք, թե Կենդանաբանական այգին՝ սենց, խորհուրդ, բան․․․ Կուրացիա ունի, վարչություններ կան, ունի իրա կանոնադրությունը: Ես չտեսա, որ մի անգամ Դուք կամ Ձեր նման մտածող մարդիկ Վարդաշենի վթարային շենքը, 7 ամիս ա՝ ասում ենք փլվում է մարդկանց գլխին, 5 րոպե գնաք, այցելեք այդ բնակիչներին, կենդանի մարդիկ, ովքեր ամեն րոպե սթրեսի մեջ ընկած՝ իրենց կյանքն են վտանգում։ Մի անգամ չգնացիք այդպիսի հարցերով երևանցիների կողքը կանգնեք: Իսկ Կենդանաբանական այգին, որ իր տրամաբանական առավոտը լույսը բացվում է, երեկոն արևը մայր է իջնում, իր բնականոն հունով աշխատում է, 40 րոպե այդ մասին եք խոսում: Որքա՞ն կարելի է դուք այստեղ չարաշահեք մեր համբերությունը: Դուք խոստացել եք երևանցիներին, որ իրենց հարցերով կզբաղվեք, ե՞րբ եք մի անգամ գնացել Վարդաշենի վթարային շենքեր, տեսել՝ մարդիկ ինչ վատ պայմաններում են, երբ ամեն օր քանդվում է այդ շենքը, հազիվ ճանաչեցիք չորրորդ կարգի: Մի օր կասե՞ք՝ ե՞րբ եք երևանցիների մասին մտածել: Խոստացել եք, խաբել եք ամբողջ երևանցիներին»,- մասնավորապես նշեց Ներսիսյանը։

Մանրամասները՝ տեսանյութում։