ՅՈՒՆԵՍԿՕ-ն  մեզ մշակութային անեքսիայի է ենթարկում. Սեդրակ Մամուլյանը տոլման ադրբեջանական ուտեստ ճանաչելու մասին

Հայկական ավանդական տոլման ՅՈՒՆԵՍԿՕ-ն որակել է ադրբեջանական կերակրատեսակ։  Կազմակերպության պաշտոնական կայքում նշված է, որ տոլման ճանաչվել է ոչ նյութական մշակութային ժառանգություն։ «Տոլման պատրաստվում է Ադրբեջանի ամբողջ տարածքում և համարվում կարևոր կերակրատեսակներից մեկը »,- ասված է հաղորդագրության մեջ։

«Մեր կազմակերպությունը և ես՝ որպես անձ, ՅՈՒՆԵՍԿՕ-ի որևէ որոշում լուրջ չենք ընդունում»,- Factor.am -ի հետ զրույցում ասաց «Հայկական խոհարարական ավանդույթների զարգացում և պահպանում» ՀԿ-ի ղեկավար Սեդրակ Մամուլյանը. « ՅՈՒՆԵՍԿՕ-ն ընդունենք այնպես, ինչպես ընդունված է՝ ազնվության, խելամտության վերին ատյան, այն գոնե մեզ համար բոլորովին հակադիր որոշումներ է կայացնում»:

Մամուլյանը նշում է պայքար պետք է տարվի և դա պետք է կատարվի բոլորի կողմից, որպես պայքարի տեսակ նա առաջարկում է ավելի ընդլայնել տոլմայի փառատոնը, բոլորին իրազեկել և ներկայացնել իրականությունը. «Մյուս մայիս ամիսը մենք աշխարհում հայտարարել ենք տոլմայի ամիս և որքան ընկերներ, ծանոթներ ունենք, բոլորը համաձայնել են մայիսին տոլմայի օրեր հայտարարել»:

Մամուլյանը սա պարտություն չի համարում, ավելին նշում է՝ իսկ մենք արդյոք որևէ մեկին ապացուցելու բան ունե՞նք. «Ես օրինակ հարմար կգտնեի, որ ՅՈՒՆԵՍԿՕ-ին բոլոր երկրները հարաբերվեն առևտրի նախարարություններով, որովհետև այնտեղ զուտ առևտուր է: Ադրբեջանը իր ողջ 100-ամյա պատմության ընթացքում ինչ-որ բան է ուզում ապացուցել, անլիարժեքության բարդույթով հիվանդ ազգություն են: Մենք ապացուցելու որևէ բան ունե՞նք, տոն կա՞, որ տոլմա չլինի մեր սեղաններին: Մենք ուղղակի խոսելիս պիտի վստահ ասենեք, որ եթե հակառակորդը ռազմի դաշտում է մեզ ֆիզիկական  անեքսիայի ենթարկում, ապա ՅՈՒՆԵՍԿՕ-ն էլ՝ մշակութային»:

Նշենք, որ մենք ավելի վաղ ևս անդրադարձել էինք այս թեմային՝ «Ադրբեջանը ցանկանում է յուրացնել տոլման, քոչարին և քյամանչան․ ինչո՞ւ հայկական կողմը թողեց, որ դանակը հասնի ոսկորին» խորագրով հոդվածում:

Լիլիթ Շաբոյան