Երիտասարդ մի սերունդ մտածեց, որ հեղափոխությունն արվել է՝ գրականության ոլորտն իրենով անելու, ազգականներին պաշտոնների տեղավորելու համար․ Վահրամ Մարտիրոսյան․ ՏԵՍԱՆՅՈՒԹ

«Այսօր մեր երկրում դադարի, ստագնացիայի տարրերով վիճակ է։ Հասել ենք մի տեղ, որից ո՛չ հետ ենք գնում, ո՛չ առաջ»,- Factor.am-ի հետ զրույցում նման տեսակետ է հայտնում արձակագիր, կինոսցենարիստ Վահրամ Մարտիրոսյանը։

Անդրադառնալով դեռևս 2018 թվականին վարչապետ Նիկոլ Փաշինյանի հնչեցրած այն հայտարարությանը, թե «ոչ մի մուկ և ոչ մի ձուկ չի պլստալու․ Հայաստանում գողերի ժամանակն անցել է», գրողը նկատում է․ «Շատերն են պլստացել․ կարելի է կարդալ այն մարդկանց ցուցակը, որոնց ՌԴ-ն չի արտահանձնում Հայաստանին քրեական գործերով, և պարզ կդառնա, թե ովքեր են պլստացել։ Լավ է, որ կա մթնոլորտ, որ պահանջում ենք շուտ բռնել, վերադարձնել թալանը, վատ է, որ արդյունքն ավելի փոքր է, քան ակնկալում էինք։ Իշխանությունը չի կարողացել բավարար չափով արդյունավետ միջոցներ գտնել»։

Վահրամ Մարտիրոսյանը խոսում է նաև առարկայական նոր չափորոշիչների մասին։ Նա ողջունելի է համարում նոր չափորոշիչների ներմուծման փորձը, բայց, միևնույն ժամանակ, նկատում․ «Դրանք հեռու են հայկական նոր պատումի ստեղծմանը նպաստելուց։ Այն, ինչ կատարվում է գրականության ոլորտում, խայտառակություն է։ Պարզվեց՝ երիտասարդ, պայծառ մի սերունդ մտածեց, որ հեղափոխությունն արվել է՝ գրականության ոլորտն իրենցով անելու համար, որպեսզի իրենց ազգականներին և ընկերներին պաշտոնների տեղավորեն։ Դասագիրք մտնելը մի բան է, մնալը՝ այլ։ Մնալն է կարևորը»։

Արձակագիրն անդրադառնում է նաև հանրության շրջանում տիրող ատելության մթնոլորտին․ «Անհրաժեշտ է, որ հնչեն ոչ միայն սիրո քարոզներ, այլև վերացվի այն քֆուր-քաֆարը, որ կա մեր հասարակության մեջ։ Հեղափոխությունից հետո փոխանակ համերաշխություն լիներ, հայհոյանքի մակարդակն է սրվել։ Կոշտ միջոցներ են պետք, որպեսզի վաղը չունենանք իրար ատող մարդկանց մեծ բազմություն»։

Հարցազրույցն ամբողջությամբ՝ տեսանյութում։

Աննա Բաբաջանյան