03.06.2026 | 15:35
ՆԱՏՕ-ի գլխավոր քարտուղար Մարկ Ռյուտեն չհայտարարված այցով Կիևում է
Պարտադիր զինվորական ծառայություն չանցած անձանց 2019 թվականից հետո սպառնում է բանտարկություն. ԱԺ-ն միաձայն կողմ քվեարկեց նախագծին
Քաղաքականություն
06.12.2017 | 10:38
Ազգային ժողովն այսօր միաձայն ընդունեց մի խումբ պատգամավորների կողմից ներկայացրած «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» օրինագիծը:
Հիշեցնենք, որ նոյեմբերի 17-ին խորհրդարանն առաջին ընթերցմամբ միաձայն ընդունել էր «Սահմանված կարգի խախտմամբ զինծառայություն չանցած քաղաքացիների մասին» օրենքի նախագիծը: Փոփոխություններով բանակից խուսափած և հետախուզման մեջ գտնվող Հայաստանի այն քաղաքացիները, ում 27 տարին լրանում է մինչև 2017 թվականի դեկտեմբերի 1-ը, հնարավորություն կունենան ամեն բաց թողնված զորակոչի համար վճարելով 200 հազար դրամ՝ ազատվել քրեական հետապնդումից և վերադառնալ հայրենիք: Օրենքը կգործի մինչև 2019 թվականի դեկտեմբերի 31-ը:
Մինչ քվեարկությունը «Ելք» խմբակցության ղեկավար Նիկոլ Փաշինյանը պարզաբանեց՝ թեև նախագծի հետ կապված առարկություններ ունեն, բայց կողմ են քվեարկում:
«Մենք խնդիր ունենք նրա հետ, որ մուծումների չափերն ավելացվում են, բայց այնուամենայնիվ, կողմ կքվեարկենք, որ այն քաղաքացիները, որոնք ուզում են այս հնարավորությունից օգտվել, կարողանան դա անել»,- ասաց Փաշինյանը:
Նշենք, որ երեկ հարցի քննարկման ժամանակ ՀՀ պաշտպանության նախարարի առաջին տեղակալ Արտակ Զաքարյանը հայտնել էր, որ սա վերջին հնարավորությունն է, և բոլոր այն անձինք, ովքեր ժամանակին զինվորական ծառայությունից խուսափել են, և լրացել է նրանց 27 տարին, կարող են համապատասխան վճարումները կատարել և ազատվել քրեական հետապնդումից: Իսկ թե ինչ է սպասվում նրանց, ովքեր չեն ներկայանա մինչև սահմանված ժամկետը, Զաքարյանը երեկ շեշտեց՝ քրեական հետապնդում:
«Դրանից հետո ովքեր որ չեն ներկայանում, ունեն մի քանի ճանապարհ․ կամ դատական կարգով կրել պատասխանատվություն կատարված հանցագործության համար՝ եթե վաղեմության ժամկետը չի ավարտվել, կամ շարունակել օտար ափերում անցկացնել ժամանակ»,- ասել էր պաշտպանության փոխնախարարը:
Շողիկ Գալստյան
