ՊԵԿ ղեկավարի տեղակալի կյանքը անցած մեկ տարում չի լավացել, նա չի բացառում նոր թանկացումները

«Եվրասիական տնտեսական միության Մաքսային օրենսգիրքն առհասարակ մաքսատուրքերի հարցին չի առնչվում, մաքսատուրքերի հարցը կարգավորվում է ԵՏՄ տնտեսական հանձնաժողովի համապատասխան որոշմամբ, որով սահմանված է միասնական մաքսատուրք»,- խորհրդարանում լրագրողներին ասաց Պետական եկամուտների կոմիտեի նախագահի տեղակալ Վախթանգ Միրումյանը:

ՊԵԿ նախագահի տեղակալը լրագրողների հորդորով անդրադարձավ հունվարից հետո հնարավոր թանկացումներին: «Հայաստանի համար միասնական տարիֆների բացառության ժամկետը կամաց-կամաց լրանում է՝ մինչև 2020 թվականը՝ յուրաքանչյուր ապրանքատեսակի մասով: Թե քանի տոկոս թանկացում է սպասվում… առհասարակ դժվար է պատասխանել՝ թանկացում սպասվո՞ւմ է, թե՞ ոչ: Օրինակ՝ թռչնի մսի համար նախատեսված է, որ մաքսադրույքը 14 տոկոսից սահամանվելու է 18 տոկոս: Այսինքն՝ 4 տոկոսային կետով ավելացում է լինելու, բայց թե ինչպես դա կանդրադառնա գների վրա, պայմանավորված է մի շարք հանգամանքներով»,- շարունակեց Միրումյանը:

Բացի այդ, Կառավարության ներկայացուցիչը պարզաբանեց՝ ԵՏՄ անդամ երկրներից ներմուծումները մաքսատուրքով չեն հարկվում, այսինքն՝ եթե Հայաստանը երրորդ երկրներից ներմուծումը փոխարինում է ԵՏՄ երկրներից կատարվող ներմուծումներով, նշանակում է, որ մաքսատուրքի թանկացումը չի ազդում այդ ապրանքի վրա:

«Երկրորդ, մենք ունենք ազատ առևտրի մասին համաձայնագրեր մեր գործընկեր այլ երկրների հետ: Եթե տվյալ ապրանքատեսակի ներմուծումը փոխարինվեց տվյալ համաձայնագրի կողմ հանդիսացող երկրներից մեկից ներմուծումներով, բնականաբար, կստացվի, որ որևէ ազդեցություն չի կարող ունենալ: Այստեղ պետք է նկատի ունենալ նաև այն հանգամանքը, որ այն անցումային ժամանակահատվածը, որը տրված էր Հայաստանին, դա նաև տեղական արտադրությունը պաշտպանելու միջոց է: 2015 թվականին մենք արդեն գիտեինք, որ 2018-ից տեղական արտադրողն ավելի լայն հնավորություններ է ունենալու, սա նաև հնարավորություն է տեղական արտադրողի համար, օրինակ, թռչնի մսի արտադրությունն ընդլայնելու համար»,- ընդգծեց Միրումյանը:

Ըստ Միրումյանի՝ այդ քաղաքականության նպատակներից մեկն էլ այն է, որ ԵՏՄ անդամ երկրները միմյանց միջև ակտիվ առևտուր անեն՝ չհերքելով, որ այդ դեպքում երրորդ երկրներից Հայաստան ներմուծումները կրճատվելու են: «Այո, եթե մաքսատուրքի դրույքաչափերը բարձրանում են, ստեղծվում է այլ հավասար պայմաններում հնարավորություն՝ այնպիսի երկրներից ներմուծելու, որտեղ մաքսատուրքերի ազդեցությունը չեզոքացվում է»,- շեշտեց պաշտոնյան՝ ընդգծելով, որ այդ ամենը Հայաստանի կառավարությանը հիմք է տալիս ենթադրելու, որ 2018 թվականի հունվարից Հայաստանում էական թանկացումներ չպետք է սպասել:

Ինչ վերաբերում է արդեն արձանագրված թանկացումներին, ՊԵԿ փոխնախագահն ասաց՝ դրանք մաքսատուրքերով պայմանավորված չեն:

Ի դեպ, Կառավարության ներկայացուցչի խոսքով՝ իր կյանքն էլ վերջին մեկ տարում չի լավացել, մնացել է նույնը, իսկ թանկացումների պատճառով՝ ինչպես ինքն ասաց՝ շատ դրամական միջոցներ է կորցրել:

Շողիկ Գալստյան