21.05.2026 | 18:10
Արթուր Օսիպյանը հացադուլ է հայտարարել // Վերին Արտաշատում Փաշինյանին հատուկ են դիմավորել․ ԼՈՒՐԵՐ
Անցյալ տարի Թուրքիայում ավելի քան 470 կին է սպանվել. BBC-ն անդրադարձել է երկրի ընտանեկան բռնության դեպքերին
Քաղաքականություն
18.08.2020 | 16:43
Կորոնավիրուսային արգելափակումներով պայմանավորված` աշխարհում աճել են ընտանեկան բռնության դեպքերը: Ըստ BBC-ի իրավիճակն ավելի անհանգստացնող է Թուրքիայում, որտեղ կանանց նկատմամբ բռնության դեպքերը զգալիորեն բարձր են եղել անգամ նախքան համավարակը:
Ըստ կանանց իրավունքների պաշտպանների՝ անցյալ տարի Թուրքիայում ավելի քան 470 կին է սպանվել:
Ամուսնու կողմից 10 տարի շարունակ բռնության ենթարկված թուրք երիտասարդ կինը՝ Դերիան, BBC-ին է ներկայացրել իր պատմությունը։
«Սկզբում նա (խմբ. ամուսինը) կոտրում էր բաժակներն ու ափսեները, հետո անցավ սեղաններին ու աթոռներին: Ինձ ասում էին, որ բոլորի ընտանիքներում էլ նույն պատկերն է, բայց օր օրի իրավիճակը ավելի էր սրվում»,- պատմել է Դերիան՝ ընդգծելով, որ ցանկացել է ամուսնալուծվել, սակայն ամուսինը թույլ չի տվել։
Երկու ամիս առաջ ամուսինը հարձակվել է կնոջ վրա այգում, պահել զենքը կնոջ վրա, կրակելու փորձ արել, բայց չի ստացվել: Ձախողելուց հետո նա հարվածել է աշխատանքի շտապող կնոջ դեմքին: Երբ արնաշաղախ կինը փորձել է օգնություն կանչել, ամուսինը մատները մտցրել է կնոջ բերանը՝ թույլ չտալով նրան գոռալ:
Դերիան, ում ամուսինը այժմ սպասում է իր դատավճռին, որոշել է կիսվել իր պատմությամբ այլ կանանց օգնելու համար:
«Հիմա ես բավականին քաջություն ունեմ ասելու՝ բավական Է: Այս ամենը շարունակվել է 10 տարի: Ուզում եմ, որ աղջիկներս ապրեն այնպիսի երկրում, որտեղ նրանց իրավունքները օրենքով պաշտպանված կլինեն, որտեղ նրանց խոսքերին կհավատան, որտեղ նրանք ստիպված չեն լինի խոսել միայն վնասվելուց հետո»,- ասում է կինը:
Նույն հրապարակման մեջ BBC-ին անդրադարձել է նաև 27-ամյա Պինար Գուլտեկինին, ում սպանել և տակառի մեջ էին նետել:
Թուրքիայի իշխանությունները քննարկում են Ստամբուլի կոնվենցիայից դուրս գալու հնարավորությունը: Իրավապաշտպանները ասում են, որ Կոնվենցիայից դուրս գալուց հետո Թուրքիայում կանանց կյանքը վտանգի մեջ կլինի:
Մանրամասները՝ տեսանյությում:
