Գյումրու օրը այս տարի անցկացվելու է առցանց տարբերակով

Այս տարի «Գյումրու օր» տոնակատարությունը՝  պայմանավորված աշխարհում տիրող  համավարակային իրավիճակով և Հայաստանում   հայտարարված արտակարգ դրությամբ, անցկացվելու է առցանց ՝ «Իմ սեր Գյումրի» խորագրով։  Քաղաքի տոնը կնշվի սեպտեմբերի 5-ին։ Այս մասին տեղեկացնում է Գյումրու քաղաքապետարանը։

«Աշխարհի ամենահյուրընկալ քաղաքի համար տոնն առանց հազարավոր հյուրերի նշելը, իհարկե, անսովոր կլինի, բայց, համացանցի բոլոր հնարավորություններն օգտագործելով, մենք կարող ենք սեպտեմբերի 5-ը դարձնել տարվա ամենագյումրիական օրը։ Քաղաքի մարդիկ, քաղաքի նոր ու սիրուն, հին ու պատմական վայրերը, քաղաքի մեղեդին ու գույները՝ առցանց՝ հնարավոր բոլոր հարթակներում»,- ասվում է հայտարարության մեջ։

Նշենք, որ Գյումրու ավագանին  հունիսի  10-ին կայացած նիստում,  քաղաքի օրվա  միջոցառումների կազմակերպման համար 8 մլն դրամ էր հատկացրել, այնքան, որքան 2019թ-ի տոնակատարության համար։ Քաղաքապետն ու ներկաները նաև հույս էին հայտնել, որ համավարակը կնահանջի և քաղաքի օրը հնարավոր կլինի մեծ շուքով նշել։

«Շատ ուրախ կլինենք, որ մինչև Գյումրու օրը նշելը այս կարանտինային իրավիճակը, արտակարգ իրավիճակը կվերանան, և մենք կկարողնանք մեր քաղաքի տոնը շուքով նշել։ Բյուջեով նախատեսված է, սպասում ենք, որ օրը գա և հնարավոր լինի միջոցառում անել»,- ասել էր Գյումրու քաղաքապետարանի ֆինանսական բաժնի պետ Լենա Ջիլավյանը։

Հիշեցնենք, որ անցյալ տարի Գյումրու օրը մեծ շուքով   նշվել էր օգոստոսի 25-ին «Վարպետների քաղաք Գյումրի» խորագրով։  Կազմակերպվել էին տարբեր միջոցառումներ՝ համերգներ, թատերականացված ներակայացումներ, ֆլեշ-մոբեր։ Քաղաքը հյուրընկալել էր մեծ թվով հյուրերի ու զբոսաշրջիկների։ Տոնական միջոցառումներին մասնակցել  էր նաև ՀՀ վարչապետ Նիկոլ Փաշինյանը։

Էմմա Չոբանյան