«Գյումրի» ԲԿ-ն վերսկսել է  պլանային վիրահատությունները․ ավելացել է  բացասական թեստով  ծանր թոքաբորբով հիվանդների թիվը

Շիրակի մարզում կորոնովիրուսի տարածման տեմպերի նվազման ֆոնին՝ «Գյումրի» ԲԿ-ն վերսկսել է պլանային վիրահատությունները։ Հիվանդանոցն անցնում է ազատ ու ավելի բաց ռեժիմի։ Եթե բժշկական կենտրոնը նախկինում  աշխատում էր 30 տոկոս ծանրաբեռնվածությամբ ու իրականացնում անհետաձգելի ծառայություններ, այժմ կամաց-կամաց վերադառնում է աշխատանքի բնականոն ընթացքի։

«Արդեն սկսել ենք  պլանային վիրահատությունները, ծանրաբեռնվածությունը 50-55 տոկոս է մոտավորապես։ Եթե նախկինում 50 մլն-ից մոտ 10 մլն դրամի կարգի վճարովի ծառայություն էինք անում, հիմա արդեն անցյալ ամիսը արել ենք 20 մլն։ Նվազել է տրիաժ հիվանդների քանակը, նախկին 13-15-ի տեղը այսօր կոնկրետ ունեցել ենք ընդամենը 6 հիվանդ, որոնք  նմուշառվել են։ Շատացել  են   բացասական պատասխանները»,- մեզ հետ զրույցում ասաց «Գյումրի» ԲԿ-ի տնօրեն Արմեն Իսահակյանը։

Տնօրենը նշեց, որ հիմա այլ խնդիր կա՝ բացասական թեստով ծանր  թոքաբորբով հիվանդներն են շատացել։ Մարդիկ ուշ են դիմում կամ չեն դիմում առաջնային օղակին, արդյունքում էլ ծանր դեպքեր են գրանցվում։

«8 այդպիսի հիվանդ ունենք, ունենք նաև հիվանդներ, որոնք  փաստացի երևանյան կլինիկայում  քովիդի բուժում են ստանում։Հիվանդը  դրական թեստով գնացել է, բուժումը ստացել է։  Ենթադրենք՝ իր մոտ արդեն բացասական երկու թեստ է եղել,  բայց այդ հիվանդը  դեռ կարիք ունի թթվածին շնչելու, մի 10-12 օրվա բուժման եւ  այդ հիվանդներն էլ են հետ վերադառնում Գյումրի։ Բավականին ծանր վիճակում։  Այդ հիվանդների բուժումը ծախսատար է  բավականին»,- ասաց Արմեն Իսահակյանը։

Նա հավելեց, որ խնդիրն ուզում են քննարկել առողջապահության նախարարության հետ ու լուծում գտնել, քանի որ այդ հիվանդների հետ կապված թթվածնի ահռելի մեծ ծախս են իրականացնում։

Բժշկական կենտրոնի բուժաշխատողներից էլ  այժմ մեկն է  կորոնավիրուսով հիվանդ, մյուսները՝ ապաքինվել ու վերադարձել են աշխատանքի։

Նշենք, որ Շիրակի մարզպետարանի հրապարակած վերջին տվյալներով՝ Գյումրու ինֆեկցիոն հիվանդանոցում  մարզի 28 բնակիչ է բուժվում կորոնավիրուսից: Մարզում տնային ինքնամեկուսացման ցուցում ունի 495 քաղաքացի, նրանցից 102-ի մոտ դրական ախտորոշում կա՝ հիվանդության անախտանիշ ընթացքով։ Կորոնավիրուսից առողջացել և Գյումրու ինֆեկցիոն հիվանդանոցից մինչ օրս դուրս է գրվել Շիրակի մարզի 494 բնակիչ։ 53 հիվանդ տեղափոխվել է մայրաքաղաք: Ընդհանուր առմամբ,  արձանագրվել է մահվան 36 դեպք:

Էմմա Չոբանյան