Բելառուսում բախումներ են տեղի ունեցել ոստիկանների ցուցարարների միջև քվեարկության ավարտից հետո. Euronews

Բելառուսում երեկ երեկոյան բախումներ են տեղի ունեցել ոստիկանների ու ցուցարարների միջև այն բանից հետո, երբ Բելառուսի իշխանությունները հայտարարել են, որ երկրի ավտորիտար առաջնորդ Ալեքսանդր Լուկաշենկոն հաղթել է նախագահական ընտրություններում, հայտնում է Euronews-ը:

Ըստ կենտրոնական ընտրական հանձնաժողովի տվյալների՝ գործող նախագահ Լուկաշենկոն երկրի հինգ շրջանում ձայների շուրջ 82 տոկոսով առաջ է անցել մյուս թեկնածուներից լարված ընտրություններից հետո, որոնք նշանավորվեցին ընդդիմության թեկնածուների ճնշմամբ և համատարած բողոքներով:

Ընտրությունների ողջ ընթացքին հետևող «Ազնիվ մարդիկ» անկախ ասոցիացիան հայտնել է, որ դիտորդները հայտնաբերել են շուրջ 5096 խախտում: Բացի այդ, մոտ 70 դիտորդ է բերման ենթարկել: Միաժամանակ, ասոցիացիան կասկածի տակ է առնում ընտրական հանձնաժողովի հաղորդած տվյալները ընտրողների մասնակցության վերաբերյալ:

Ընտրատեղամասերի փակվելուց հետո երկրով մեկ գրանցվել են ինտերնետի խափանման դեպքեր: Ոստիկանները և զինվորականները փակել են Մինսկի մեծ մասը՝ հավանաբար բողոքներից խուսափելու համար: Կառավարական շենքերը ևս ցանկապատված են:

Ընտրությունների նախօրեին իշխանությունները ձերբակալել էին ընդդիմադիր թեկնածու Սվետլանա Տիխանովսկայայի նախընտրական շտաբի մենեջերին: Տիխանովսկայան, որը գործող նախագահ Ալեքսանդր Լուկաշենկոյի հիմնական մրցակիցն է համարվում, ընտրական պայքարի մեջ ներգրավվեց ամուսնու ձերբակալվելուց հետո:

Կենտրոնական ընտրական հանձնաժողովի տվյալներով՝ ժամը 6:00-ի դրությամբ ընտրություններին գրանցվել է 79 տոկոս մասնակցություն:  ԿԸՀ-ի ղեկավար Լիդիա Երմոշինան կոչ է արել մյուս թեկնածուներին հանգիստ ընդունել պարտությունը և շնորհավորել հաղթողին, այլ ոչ թե «գռգռել և հրահրել» զանգվածներին:

Ընտրությունների առաջին փուլի պաշտոնական արդյունքները կհրապարակվեն այսօր: Թեկնածուն պետք է ստանա ձայների ավելի քան 50 տոկոսը ՝ առաջին փուլում հաղթելու համար:

Հիշեցնենք, որ ընտրություններին հինգ թեկնածու էր մասնակցում՝ գործող նախագահ Ալեքսանդր Լուկաշենկոն, Անդրեյ Դմիտրիևը, Աննա Կանոպացկայան, Սվետլանա Տիխանովսկայան և Սերգեյ Չերեչենը։