29.04.2026 | 15:35
Բեռնատարների հայ վարորդների՝ ՌԴ-ում գտնվելու ժամկետները երկարաձգվել են
Լիբանանի «Չեռնոբիլ»․ նման փորձության ոչ ոք պատրաստ չէր
Քաղաքականություն
08.08.2020 | 10:00
Լիբանանի «Չեռնոբիլ»: Ահա այսպես են նկարագրում ոմանք բեյրության պայթյունը, հաղորդում է «Ամերիկայի ձայնը»: Երեք հարյուր հազար մարդ մնաց անօթևան, բազմաթիվ վիրավորներ տեղափոխվեցին հիվանդանոցներ:
Բեյրութը, որը ժամանակին հայտնի էր որպես արևելքի Փարիզ, կրկին նման է պատերազմական գոտու, որը տուժել է ավերիչ պայթյունի հետևանքով: Այն իր ուժգնությամբ բնութագրվում է միջուկային պայթյունին մոտ:
Ավերված թաղամասերում սկսել են մաքրման աշխատանքներ իրականացնել: Դա ավելի դյուրին է դարձնում անհետ կորածներին փնտրելու գործը:
Մի շարք հոսպիտալներ ևս վնասվել են պայթյունի արդյունքում, որոնց թվում է Սուրբ Ջորջի համալսարանական հիվանդանոցը: Այն քաղաքի ամենամեծ հիվանդանոցներից է: Առանց ժամանակ կորցնելու՝ հիվանդանոցներն արդեն դիմում են օգնության կոչով:
Կարծիք կա, որ պայթյունը հնչել է պահեստներում ամոնիումի նիտրատի մեծ քանակության՝ ոչ պատշաճ պայմաններում պահպանելու արդյունքում, չնայած բազմաթիվ նախազգուշացումների: Այսօր ակտիվիստները կոչ են անում անկախ հետաքննություն իրականացնել:
Մի քանի ամիս շարունակվող հակակառավարական ցույցերից հետո ղեկավարության նկատմամբ հանրության վստահությունը զգալիորեն պակասել է: Հինգշաբթի օրը տեղի բնակչությունը դիմավորել է Ֆրանսիայի նախագահին հակակառավարական կոչերով:
Ֆրանսիայի նախագահ Էմանուել Մակրոնը առաջարկեց իր օգնությունը և կոչ արեց Լիբանանի իշխանություններին իրականացնել իրական բարեփոխումներ:
«Ես ցանկանում եմ լսել, հասկանալ և կազմակերպել միջազգային օգնությունը և աջակցությունը Բեյրութին և Լիբանանի ժողովրդին»,- ասել է Ֆրանսիայի նախագահը։
Լիբանանը վերջին տասնամյակների ընթացքում տեսել է շատ ցնցումներ՝ իսրայելական հարձակումներից մինչև սիրիական զավթում և 1980-ականների քաղաքացիական պատերազմ:
Սակայն նման փորձության ոչ ոք պատրաստ չէր:
