20.05.2026 | 16:56
Դիմել եմ ՌԴ դեսպանատուն պարզաբանում ստանալու համար. Նարեկ Կարապետյանը` ՌԴ քաղաքացի լինելը հերքում է․ ՏԵՍԱՆՅՈՒԹ
Դատապարտյալի կինն ահազանգում է․ ամուսինն 9-րդ օրն է՝ հացադուլ է հայտարարել․ ՔԿԾ-ն հայտնում է՝ հացադուլը դադարեցրել է
Հասարակություն
07.08.2020 | 15:47
Factor.am-ի խմբագրություն է դիմել «Կոշ» քրեակատարողական հիմնարկում պահվող դատապարտյալ Արման Սարգսյանի կինը։ Նրա փոխանցմամբ՝ Սարգսյանը հացադուլ է հայտարարել՝ իր ընտանիքի, անչափահաս երեխաների օրվա հացի խնդիրը լուծելու և իր դեմ հարուցված քրեական գործը վերանայելու պահանջով։
Կնոջ պնդմամբ՝ իր ամուսնուն մեղադրում են հարկերից խուսափելու համար և դատապարտել են հինգ տարվա ազատազրկման։ Արման Սարգսյանն անազատության մեջ է անցյալ տարվա դեկտեմբերից։
«Տան միակ աշխատողը ամուսինս էր, նա էր հոգում ընտանիքի հոգսը: Հիմա երկու անչափահաս երեխաներիս հետ՝ աղջիկս 4 տարեկան է, տղաս՝ 2, մնացել եմ միայնակ: «Փարոս» չեմ կարող ստանալ, քանի որ ապրում ենք ամուսնուս ընկերոջ տանը և գրանցում չունենք: Երեխաներիս միակ խնամակալը ես եմ, ուզում եմ աշխատել, բայց երեխաներիս ո՞ւմ հույսով թողնեմ: Աղջկաս մանկապարտեզ էի տանում, բայց հիմա վարձը չեմ կարողանում վճարել, էլ չգիտեմ՝ ինչ անեմ»,- մեզ հետ զրույցում ասաց Կարինե Հայրապետյանը:
Նա նշեց, որ դիմել են հնարավոր բոլոր կառույցներին, սակայն արձագանք չկա։
ՔԿԾ լրատվական ծառայությունից էլ մեզ հայտնեցին, որ «Կոշ» քրեակատարողական հիմնարկի դատապարտյալ Արման Սարգսյանը դադարեցրել է հացադուլը։ Բացատրական աշխատանքներ են տարվել վարչակազմի, ինչպես նաև սոցիալական, հոգեբանական և իրավական աշխատանքների բաժնի կողմից հացադուլի դադարեցման կապակցությամբ։
Հավելենք, որ Արման Սարգսյանը մեղադրվում է ՀՀ պետական բյուջե 20․237․690 ՀՀ դրամ հարկ չվճարելու համար։
Լիլիթ Շաբոյան
